“Məscidlərə 200-ə yaxın yeni imam təyin edilib”. Bunu Dini Qurumlarla İş üzrə Dövlət Komitəsinin sədri Mübariz Qurbanlı jurnalistlərə açıqlamasında bildirib.
O xatırladıb ki, din xadimlərinin təyinatını Dini Komitə həyata keçirir: "Həmin şəxslərlə bağlı məlumatlar Qafqaz Müsəlmanları İdarəsinə ötürülür. Məscidlərə ali və orta dini təhsili olan şəxslərin təyinatı aparılır. Əvvəllər kadr çatışmazlığı səbəbindən məscidlərdə çalışan din xadimlərinin əksəriyyətinin dini təhsili olmayıb. Hazırda dini təhsili olmayan şəxslərim əvəzolunması prosesi gedir. Yenilənmiş kadrların sayı 200-ə yaxınlaşmaqdadır və məscidlərə dini ayinləri yerinə yetirmək üçün qadınlar da təyin edilir".
Göründüyü kimi, artıq məscidlərimizin İran təsirində olan ruhanilərdən təmizlənməsi prosesi güclənib və onların yerini Azərbaycan təmayüllü ruhanilər tutur.
“...Yaxın gələcəkdə din sahəsində elə bir problem qalmayacaq”
Məsələyə şərh verən Milli Cəbhə Partiyasının (MCP) sədr müavini, tanımış ilahiyyatçı Tural İrfan da "Bakı-Xəbər"ə bildirdi ki, Dövlət Komitəsinin bu təyinatları təqdirəlayiqdir. “Bildirim ki, bu təyinatları müsbət qiymətləndirirəm. Çünki yeni təyin edilən din xadimlərinin ilk növbədə milli təfəkkürdə olması, yerli təhsil alması əsas götürülür. Dövlət Komitəsinin imtahangötürmə prosesi çox şəffafdır. Buna əminəm. Həmin şəxslərin hərtərəfli yoxlanılması, dini təhsili, ondan əlavə düyəvi təhsillərinin olması, qanunlarımızı hansı dərəcədə mənimsəməsi də burada nəzərə alınır.
Bilirsiz ki, ölkədən kənarda təhsil almış, eyni zamanda da xaricdə təhsil almadan xarici təsirlərə qapanmış bəzi “din xadimlərimiz” vardı. Təbii ki, Dini Komitənin həyata keçirdiyi bu proseslər nəticəsində yerdə qalan həmin “din xadmləri”nin təmizlənməsi halları da baş vercək, bu tədricən baş verir də. Bu mexanizm elə qurulub ki, artıq onun nəticəsində çox da uzaq olmayan vaxta bu məsələlər tam tənzimlənəcək, bizim məscidlərimiz, ziyarətgahlarımız belələrindən təmizlənəcək. Müsbət hal odur ki, tənzimləmə mexanizmi düzgün qurulub. Yəni o nizam elə formada qurulub ki, fikrimcə, yaxın gələcəkdə din sahəsində elə bir problem qalmayacaq. Bu təyinatlar, dini təbliğatın düzgün istiqamətdə aparılması, xarici təsirlərin kökünün kəsilməsi nəticələrin uğurlu olduğunu deməyə əsas verir”-deyə T.İrfan bildirdi.
T.İrfanın sözlərinə görə, Azərbaycan İlahiyyat İnstitutunun fəaliyyətə başlaması, məzunlar buraxması, həmçinin məscidlərə təyinat məsələlərini QMİ-nin deyil, Dini Komitənin həyata keçirməsi və sair bu kimi məqamlar bizə əsas verir deyək ki, bu məsələdə tənzimləmələr müsbət nəticələr verəcək, verir də. T.İrfan “bizim ölkədə əsasən İran təhsilli və İranın təsirində olan din xadimləri vardı. Təəssüf ki, hələ də onların bir çoxu qalır. Bu proses bizim ölkədəki dayaqlarının əli ilə köklü şəkildə aparıdığı üçün bunun kökünü birdən-birə kəsmək də mümkün deyil. Elə bilirəm ki, bu məsələ əvvəldə qeyd etdiyim proseslər nəticəsində zamanla tənimlənəcək. Onlar artıq bizə öz ziyanlarını vurublar. İrançıların 30 ilə yaxın bir müddətdə Azərbaycanda kök salması, törətdikləri fəsadlar, onların rəsmi nümayəndələrinin burada oturub bu məsələləri idarə etməsi, QMİ-nin də buna şərait yaratması, hətta o məsələlərdə onlara şərik olması təəssüfləndirici məqamlardır. Amma keçmiş keçmişdə qaldı və biz bu acı olaylardan dərs götürməliyik. Ümidvaram ki, 200 nəfərin məscidlərə təyin olunması və növbəti mərhələlərdə milli kadrların təyinatının aparılması öz müsbət nəticəsini verəcək. Artıq məscdilərə imamların təyinatı da, nəzir məsələləri də, təhsil məsələsi də tənzimlənir. Yerli təhsillilərə önəm verilir. Bu sahədə İlahiyyat İnstitutu fəaliyyət göstərir, kolleclərimiz də var, ola bilsin növbəti dövrdə bu kolleclərin sayının artırılmasına ehtiyac oldu. Bu da çox müsbət hal olardı. Hesab edirəm ki, bu məsələlər hamısı yaxın vaxtlarda öz yerini tutacaq.
Bizim din sahəsində əsas təhlükə İran təhlükəsidir. Çünki orada din təhsili adı altında yetişdirib göndərdikləri şəxslər bizim dövlətin əleyhinə fəaliyyət göstəriblər, o adamlar burada sünni-şiə təfriqəsi, məzhəbçilik və radikalizm yaratmaq, həmçinin dini siyasiləşdirmək, ənənəvi islamdan kənara çıxaraq İran modelini Azərbayanda tətbiq etmə cəhdlərində və sair bulunublar. Əsas vacib olan bunların kökünün kəsliməsidir. Bu sahədə Dini Komitənin və onun nəzdində olan İlahiyyat İnstitutunun fəaliyyətini təqdir edirəm, hesab edirəm ki, onlar daha əhatəli fəaliyyət göstərməlidirlər. Mənəvi Dəyərlərin Təbliği Fondu var. Bu fondun xətti ilə də Bakıda və bölgələrdə düzgün maarifləndirmə işi aparılır, normal dini ədəbiyyatın çapı və yayılması istiqamətində işlər görülür, din xadimlərinin iştirakı ilə bölgələrimizdə konfranslar, yığıncaqlar təşkil olunur. Ümid edirəm ki, bütün bunlar mövcud olan neqativ halların aradan qalxmasına səbəb olacaq”-deyə T.İrfan qeyd etdi.
Leyla QARAXANLI
