“Azərbaycanın öz ərazilərində süverenliyini tam bərpa etdikdən və Xankəndidə üçrəngli bayrağımız dalğalandıqdan sonra bizi istəməyən qüvvələr, ayrı-ayrı institutlaşmış xristian təriqət icmaları, mərkəzlər cəmiyyətimizə sızıb müəyyən təbliğat işləri aparmaqdadır.
Son günlər müşahidə etdiyim xoşagəlməz bir halı sizinlə bölüşmək istəyirəm. Xankəndi zəfərindən sonra çox təhlükəli dini missionerlik təbliğatı başlayıb və bu, qadınlar vasitəsilə həyata keçirilir. Adını “xristian” təriqəti qoyan bəzi icmalar aşkar şəkildə öz tərqiənlərini yaymaqla, təbliğ etməklə məşğuldurlar”. Bunu “Bakı-Xəbər”ə açıqlamasında AVCİYA-nın vitse-prezidenti, professor Məhərrəm Zülfüqarlı bildirib.
“Çox təəssüf ki, artıq Bakıda bu proses güclənib, ictiamiyyəti ayıq-sayıq olmağa çağırıram”
O qeyd etdi ki, şəxsən özü bu halın şahidi olub və bundan rahatsızlıq keçirib. M.Zülfüqarlının sözlərinə görə, hansısa şübhəli təşkilatların bu kimi fəaliyyəti cəmiyyət üçün böyük təhlükədir. Azərbaycanın tolerant, dini dözümlülüyün hökm sürdüyü bir ölkə olduğunu deyən M.Zülfüqarlı hesab edir ki, Azərbaycanın öz əraziləri üzərində suverenliyini bərpa etməsindən rahatsız olan qüvvələr bu tolerantlıqdan sui-istifadə edib missonerləri ortaya atıblar. “Həm bir alim, həm də xalqını sevən bir vətəndaş kimi üzləşdiyim bu mənəzərə məni çox narahat etdi. Son zamanlar çoxlarından eşidirəm ki, bu tip insanlar peyda olub və onlar vətəndaşları xristianlığa dəvət edirlər. Mənşəyi bilinməyən bu təriqətin təbliğində qadınlar xüsusi fəallıq göstərir. Bu günlərdə iki qadın qarşımı kəsib rus dilində bilib-bilmədiyimi soruşdu, dedim ki, bilirəm, bundan sonra onlar mənə xristian dinini təbliğ etməyə, hansısa ədəbiyyat göstərməyə başladılar, kiçik bir buklet verdilər, dinimiz haqda məlumat verdilər və sair. Etika xatirinə onları dinlədim və bir söz demədim, təkcə tarixçi olduğumu, universitetdə dərs dediyimi bildirdim. Çox təəssüflər olsun ki, onların missionerlik fəaliyyəti küçə ilə məhdudlaşmır, hətta evlərə də gəlirlər, qapıları bir-bir döyüb öz təbliğatlarını aparırlar. Çox təhlükəli missionerlik fəaliyyəti başlanılıb və onlar şirnikləndirici təkliflərlə bizim insanları öz tərəflərinə çəkmək istəyirlər. Hətta ola bilsin, onların təsiri altına düşənlər də yox deyil. Çünki bu missionerlərin təmsil olunduqları icmanın maliyyə imkanları da var və onlar insanları bu yolla da özlərinə cəlb edə bilərlər. Qalib dövləti ideoloji cəhətdən sarsıtmağın bir yolu da bu missionerlikdir, fikrimcə, onlara qarşı ehtiyatlı olmaq lazımdır. Çox təəssüf ki, artıq Bakıda bu proses güclənib, ictiamiyyəti ayıq-sayıq olmağa çağırıram. Yəqin ki, aidiyyəti qurumlar da bu missionerlərlə bağlı araşdırma aparacaq. Onların fəaliyyəti çox təhlükəlidir”-deyə M.Zülfüqarlı əlavə etdi.
Əli TURABOV
