Qazax rayon Cəfərli kənd tam orta məktəbinin şagirdləri bu günlərdə rayondakı pirlərdən birinə aparılıb və “dilək ağacı" ətrafında onların fotosu çəkilib. Qeyd edək ki, foto sosial şəbəkələrdə, mətbuatda müzakirəyə çıxarılıb və etirazla qarşılanıb.
Danılmaz faktdır ki, tək məktəblər tərəfindən deyil, həm də valideynlər tərəfindən uşaqların ziyarətgahlara, pirlərə aparılmasına geniş rast gəlinir. Xüsusən də şagirdlərin ali məktəblərə qəbul imtahanı verməsi ərəfəsində pirlərə, ziyarətgahlara axın çoxalır.
Ümumiyyətlə, şagirdlərin təhsil almaqları yerinə xurafata sürüklənmələri nə dərəcədə doğrudur? Müəllimin uşaqları məcburi şəkildə dinə cəlb etməyi, batil inancalara aparmağı düzgündürmü?
Qazax-Tovuz Regional Təhsil İdarəsi: “Həmin şəkil yanlışlıqla məktəbin rəsmi feysbuk səhifəsində paylaşılıb”
Məsələ ilə bağlı Qazax-Tovuz Regional Təhsil İdarəsindən “Bakı-Xəbər”ə bildirildi ki, məlum foto məktəbin səhifəsində yanlışlıqla paylaşılıb: “Qazax rayon Cəfərli kənd tam orta məktəbi tərəfindən şagirdlərin məktəbdənkənar asudə vaxtlarının təşkili məqsədilə kənd ərazisində olan tarixi yerlərə ekskursiya təşkil edilib. Və həmin ərazidə olan ağacın ətrafında şəkil çəkilib. Həmin şəkil yanlışlıqla məktəbin rəsmi feysbuk səhifəsində paylaşılıb”.
Tural İrfan: “Müəllim şagirdləri xurafata cəlb etməyə yox, xurafatdan uzaq durmağa təşviq etməlidir”
Ilahiyyatçı Tural İrfan “Bakı-Xəbər”ə açıqlamasında qeyd etdi ki, ölkəmizdə din dövlətdən ayrıdır. Təhsil müəssisələri də şagirdləri dini ocaqlara, ibadət yerlərinə, pirlərə yox, təhsilə cəlb etməlidir: “Din işi ilə məşğul olan, dini təbliğatı təşkil edən qurumlar var. Lazım olanda məktəblərdə də tədbirlər təşkil edirlər. Qazaxda yaxşı olardı ki, o şagirdləri təhsillə bağlı, tarixi abidələrlə bağlı yerlərə aparaydılar. Məsələn, Seminariya binası, Molla Vəli Vidadinin məzarı, Səməd Vurğunun ev muzeyi… Asudə vaxtlarda tarixi, mədəni əhəmiyyət kəsb edən yerlərə, tarixi abidələrə, hətta dini ocaqlara təhsil müəssisəsi tərəfindən ekskursiya təşkil etmək olardı. Xurafat mənbəyi olan, budaqlarına qara bağlanmış ağacın ətrafına şagirdləri cəlb etmək düzgün deyil”.
T.İrfan hesab edir ki, müəllim şagirdləri xurafata cəlb etmək yox, xurafatdan uzaq durmağa təşviq etməlidir: “Qayalara, daşlara, ağaclara inam İslamdan əvvəlki dinlərdə mövcud olub. İslam dinində belə şeylər xurafat hesab olunur və müasirliklə də uyğun deyil”.
Günel CƏLİLOVA
