Bakı şəhərinin kanalizasiya sistemi ilə əhatə səviyyəsi müasir dünya standartlarından xeyli geri qalır. Xüsusilə paytaxtın ətrafında yerləşən qəsəbələrdə, onlara yaxın ərazilərdə salınan yeni yaşayış sahələrində kanalizasiya ən ciddi problemlərdən biridir.
Yüz minlərlə evin tullantı suları həyətlərdə qazılmış quyulara axıdılır. Bu isə müxtəlif ərazilərdə qrunt sularının səviyyəsinin artmasına, torpağın aşınmasına səbəb olur.
Belə bir hal Sabunçu rayonu, Maştağa qəsəbəsi, Mənsur Vəkilov küçəsində yaşanır. Sakinlər ərazidən keçən su kanalının çirkab tullantıları üçün istifadə edilməsindən şikayətçidir. Sakinlər deyir ki, aidiyyəti qurumlardan tək istədikləri ərazinin kanalizasiya xətləri ilə təmin olunmasıdır. Bununla bağlı dəfələrlə müraciət etsələr də nəticə olmayıb.
Azərsu ASC: “Həmin ərazidə mərkəzləşmiş kanalizasiya infrastrukturu mövcud deyil və gələcəkdə dövlət investisiyaları hesabına qurulması planlaşdırılır”
Məsələ ilə bağlı Azərsu ASC-dən isə bildirildi ki, həmin ərazidə mərkəzləşmiş kanalizasiya infrastrukturu mövcud deyil və gələcəkdə dövlət investisiyaları hesabına qurulması planlaşdırılır.
Elxan Əliyev: “Hər bir icra hakimiyyəti tabeliyindəki qəsəbənin, kəndin sosial problemlərini həll etməyə borcludur”
Sosial sahə üzrə ekspert Elxan Əliyev qeyd etdi ki, hər bir icra hakimiyyəti tabeliyindəki qəsəbənin, kəndin sosial problemlərini həll etməyə borcludur. İcra qurumu bunu həll edə bilmirsə, o zaman müvafiq qurumlar qarşısında məsələ qaldırmalıdır: “Nəzərə almaq lazımdır ki, “Yerli icra hakimiyyətləri” haqqında əsasnaməyə görə, qurum ərazidə olan avtomobil yollarının təmirinə, yaşıllaşdırmaya, təmizlik və işıqlandırmaya, eyni zamanda, qəsəbədəki küçələrin ünvanlanması məsələsinə cavabdehlik daşıyır. Qurum borcludur ki, infrastrukturun qurulmasında birbaşa iştirak etsin. Hər il su və kanalizasiya sistemlərinin qurulması ilə bağlı milyonlarla vəsait ayrılır. Ancaq görünən odur ki, bu sahədə ciddi korrupsiya halları var”.
Ekspert onu da əlavə etdi ki, çirkab suların yaşayış evlərinə yaxın ərazidən axması antisanitar vəziyyət yaratmaqla yanaşı, ərazini xəstəlik mənbəyinə çevirir: “Belə olan halda, üfunət iyi, gəmirici və həşəratlar yaxınlıqdakı evlərə dolur, narahatlıq yaradır, xəstəliklərin yayılmasına səbəb olur”.
Əli TURABOV
