Masallı rayonunda Azərbaycanın Milli Qəhrəmanı Səfəralı Məmmədovun anadan olmasının 60 illik yubileyi münasibətilə tədbir keçirilib.
Masallı Rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin məsul işçilərinin, Sərçuvar kənd ərazi nümayəndəliyinin, kənd sakinlərinin, ziyalıların, qəhrəmanın ailə üzvlərinin və ictimaiyyət nümayəndələrinin qatıldığı tədbirdə Azərbaycan Respublikasının Dövlət Himni oxunub, şəhidlərin xatirəsi bir dəqiqəlik sükutla anılıb.
S.Məmmədov adına Sərçuvar kənd tam orta məktəbində, Milli Qəhrəmanın abidəsi önündə baş tutan tədbirdə qəhrəman polisin həyatı və keçdiyi döyüş yolu barədə danışılıb: - Azərbaycanın Milli Qəhrəmanı Səfaralı Qurban oğlu Məmmədov Birinci Qarabağ müharibəsində Vətənimizin bütövlüyü uğrunda misilsiz fədakarlıq nümunəsi göstərib. Bu yolda onun şərəfli ölümü əsl qəhrəmanlıq məktəbi kimi tarixə yazılıb. Özündə doğma Azərbaycanına, xalqına məhəbbət hissi yaşatmaqla, milyonların ürəyinə köçən Vətən sevdalısı Ağdam rayon, Daxili İşlər Şöbəsində post-patrul batalyonunda tağım komandiri vəzifəsində xidmət edib. O, 1992-ci il fevralın 16-da Xocavənd rayonunun Qaradağlı kənd sakinlərini azğınlaşmış erməni quldurlardan xilası zaman şəhid olub. O, ölümündən sonra “Azərbaycanın Milli Qəhrəmanı” adına layiq görülüb. Masallı şəhərində küçələrdən birinə, igid döyüşçünün təhsil aldığı məktəbə onun adı verilib, məktəbin həyətində büstü qoyulub, cəsur döyüşçüyə həsr olunmuş “Qəhrəman polis” adlı sənədli film çəkilib.
Çıxışlarda o da bildirilib ki, bu gün Azərbaycanın Milli Qəhrəmanın parlaq ulduzlar dünyasında dolaşan ruhu çox şaddır. Çünki, uğrunda döyüşərək qan tökdüyü Vətən torpaqları artıq yağı işğalından azaddır. Həmin müqəddəs yerlərdə indi Müzəffər Ali Baş Komandan, Prezident İlham Əliyev tərəfindən şanlı üçrəngli bayrağımız dalğalanır .
Tədbirdə məktəblilərin iştirakı ilə ədəbi-bədii kompozisiya nümayiş etdirilib və Milli Qəhrəmanın ev muzeyi, eləcə də məzarı ziyarət olunub.
Zəfər ORUCOĞLU Azərbaycan Jurnalistlər Birliyinin üzvü
