Oğuzun Sincan kəndinin sakinləri susuzluq problemindən əziyyət çəkirlər. Kənd sakinlərinin sözlərinə görə, su üçün hər gün 500 metr məsafə qət etməli olurlar. Su problemi yaşandığı üçün kənd sakinləri əkinçiliklə məşğul ola bilmir. Sakinlər qeyd edir ki, adi göyərtini belə almalı olurlar. Çünki göyərti əkmək üçün su yoxdur.
Sakinlər onu da qeyd edir ki, su probleminin həll olunması üçün aidiyyəti qurumlara müraciət etsələr də onlara heç bir cavab verilməyib.
Elxan Əliyev: “Oğuz rayon Sincan kəndində yaşanan həm içməli, həm də suvarma suyu ilə bağlı problem kökündən həll olunmalıdır, bunun üçün xüsusi…”
Sosial sahə üzrə ekspert Elxan Əliyev bildirdi ki, hazırda bir sıra rayonlarda su çatışmazlığı problemi var. Xüsusən də kənd əhalisinin təsərrüfat sularında çox ciddi problemləri yaranıb. Problemin kökü müxtəlif səbəblərdən qaynaqlanır: “Bir çox kəndlər içməli su xətləri ilə təmin olunmadığından əhali içməli suyu kanaldan, arxdan götürməli olur. Deməli, suvarma suyu yoxdursa, içməli su da yoxdur.
Su mənbələrinin özündə ciddi problemlər var. Ən başlıca problem isə suyun istifadə edilməsindədir. Bu baxımdan hesab edirəm ki, sözügedən problemin köklü həlli ilə ciddi məşğul olmaq lazımdır. Su təsərrüfatının doğru idarə edilməsi ilə bağlı yeni sistem qurulmalıdır. Yeni su mənbələri tapılmalıdır”.
Ekspert hesab edir ki, qısa müddətdə Oğuz rayon Sincan kəndində yaşanan həm içməli, həm də suvarma suyu ilə bağlı problem kökündən həll olunmalıdır. Bunun üçün xüsusi dövlət proqramı həyata keçirilməlidir: “Rayonlardakı problemə görə insanlar təsərrüfatla məşğul ola bilmir və Bakıya axın etməli olur. Camaatın suyu olarsa, kənddən köçməz”.
Oğuz Suvarma Sistemləri İdarəsi: “Kənddə subartezian quyusunun tikilməsi nəzərdə tutulub”
Oğuz Suvarma Sistemləri İdarəsindən bildirildi ki, kənddə subartezian quyusunun tikilməsi nəzərdə tutulub və 15 gün ərzində quyunun qazılmasına başlanılacaq.
Əli TURABOV
