2024-cü ildə Azərbaycanda dövlət büdcəsi gəlirlərinin 127,4 milyon manatının və yaxud 0,4 %-nin yol vergisi üzrə daxilolmaların payına düşəcəyi proqnozlaşdırılır. Bu barədə Maliyyə Nazirliyinə istinadən xəbər verilir. Məlumata görə, bu, 2023-cü ilin təsdiq olunmuş proqnozu ilə müqayisədə 1,2 % çoxdur.
Qeyd edək ki, bir sıra ərazilərdə nəqliyyat vasitələrinin daxil olması üçün onlardan 50 qəpik məbləğində vəsait tələb olunur. Bu hal daha çox Binə-Sədərək ticarət mərkəzlərində müşahidə olunur. O da məlumdur ki, yollardan toplanan vəsaitlərlə bağlı heç bir hesabat, məlumat açıqlanmır. Qeyd etdiyimiz kimi, Sədərək-Binə ticarət mərkəzinə gün ərzində yüzlərlə, minlərlə nəqliyyat vasitəsi daxil olur. Təəssüf ki, maşınların içəri daxil olması üçün hər birindən 50 qəpik məbləğındə vəsait tələb olunsa da, toplanan vəsaitin hara xərcləndiyi açıqlanmır.
“Ödənişli yolların genişləndirilməsi müsbət haldır, ancaq həmin yollardan toplanan vəsaitin hesabatı açıqlanmayacaqsa, lazım deyil”
Sosial sahə üzrə ekspert İlqar Hüseynli “Bakı-Xəbər”ə açıqlamasında yol vergisi, yol infrastrukturuna yönələn vəsaitlə bağlı dəqiq məlumat verilməməsini absurd adlandırdı: “Bir neçə böyük ticarət, iaşə mərkəzləri var ki, orda yol istismar olunur, ancaq o ərazi onun mülkiyyəti deyil. Sədərək-Binə ticarət mərkəzində olan yol ötürücüsü respublika avto-magistral yolunun üzərində qurulub. Buna baxmayaraq, həmin yoldan kommersiya məqsidilə istifadə olunur. Sədərək-Binə ticarət mərkəzinə daxil olan vəsaitlərin taleyi məlum deyil. Yaxşı olar ki, Sədərək-Binə ticarət mərkəzinə daxil olan nəqliyyat vasitələrinin ödədiyi vəsaitin taleyi nəzarətə götürülsün: “Onu da deyim ki, yolun pullu olub-olmaması dövlət tərəfindən müəyyən edilə biləcək məsələdir. Təsəvvür edin ki, Azərbaycanda yollar salınır və bu yolların pullu olacağı barədə dövlət rəsmiləri əvvvəlcədən əhaliyə xəbərdarlıq edir. Hökumət rəsmiləri bu yollarda qiymətin neçə manat olacağına, neçə kilometr məsafədə ödənişli, qalan hissəsinin ödənişsiz olmasına qərar verirlər. Dövlətin öz siyasəti olmalıdır ki, pullu yol anlayışı da həyata keçsin. Lakin Binə və Sədərək ticarət mərkəzləri bunu tam olaraq qanunsuz şəkildə ediblər. İllərdir orda vətəndaşlardan pullar yığılır. Heç bir vergisi, hesabatı yoxdur. Sədərək ticarət mərkəzi özü üçün post qurub, gələn-gedəndən 50 qəpik pul alır. Elə bil ərəbzəngidir. Yoldan keçənlərdən yol vergisi alırlar və bunun heç bir rəsmiyyəti yoxdur. Ödənişli yolların genişləndirilməsi müsbət haldır, ancaq həmin yollardan toplanan vəsaitin hesabatı açıqlanmayacaqsa, lazım deyil”.
Günel CƏLİLOVA
