Heç birimizə sirr deyil ki, Azərbaycanda məktəbəqədər təhsil müəssisələrinin problemləri saymaqla bitməyəcək qədərdir. Bu problemlərdən ən gözəgirəni və ən dəhşətli olanı isə bağçalara uşaqların rahat oynaması, hava alması üçün ayrılmış həyətyanı torpaq sahələrinin satılması, ticarət obyektlərinin tikilməsi və icarəyə verilməsidir.
Hətta elə bağçalar var ki, az qalırlar binanı da hansısa formada icarəyə versinlər. Bu günlərdə belə məlumat yayılıb ki, Xətai rayonunun Əhmədli qəsəbəsində 13 milyon manata torpaq sahəsi satılır. Qeyd edək ki, satışa çıxarılan ərazinin ümumi sahəsi 1 hektar 28 sotdur. Ərazi vaxtilə uşaq bağçası olub. Hazırda binadan özəl tədris müəssisəsi kimi istifadə edilir. Xətaidə uşaq bağçasının ərazisinin özəlləşdirilərək 13 milyona satışa çıxarılması müzakirələrə səbəb olub.
Xətai RİH: “Məsələdən xəbərdarıq və sözügedən ərazi özəl mülkiyyətdir”
Xətai Rayon İcra Hakimiyyətindən bildirildi ki, məsələdən xəbərdardırlar və sözügedən ərazi özəl mülkiyyətdir.
Nizami Hüseynov: “Bağçalar bəzi hallarda icra hakimiyyətləri tərəfindən özəlləşdirildi, təmir adı ilə söküldü və yerində binalar, şadlıq evləri, restoranlar tikildi”
Təhsil eksperti Nizami Hüseynov bildirdi ki, məktəbəqədər təhsil müəssisələrinin, uşaq bağçalarının və körpələr evlərinin 2011-ci ildə nazirliyin tabeliyindən çıxarılmasının səbəbi o idi ki, bağçaların maddi-texniki bazası, eyni zamanda təmir-tikinti bərpa işlərinin həyata keçirilməsi üçün daha çevik qərar qəbul etmək lazım idi: “Həmin qərar bağçaların fəaliyyətinə mənfi təsir göstərir. Bağçalar bəzi hallarda icra hakimiyyətləri tərəfindən özəlləşdirildi, təmir adı ilə söküldü və yerində binalar, şadlıq evləri, restoranlar tikildi. Bu isə təlim-tərbiyə prosesinin fəaliyyətinə birbaşa mənfi təsir etdi. Ümumiyyətlə, uşaq bağçaları yerli icra hakimiyyətlərinin balansında olduğu bu 10 il müddətində rüşvət, korrupsiya ocağına çevrildi”.
Ekspert onu da əlavə etdi ki, hazırda dövlət bağçalarının sayı azdır. Bizdə bağçalar inkişaf edir, amma bu da özəl bağçalardır. Özəl bağçalar isə bütün vətəndaşlar üçün əlçatan deyil.
Əli TURABOV
