Azərbaycan bütün istiqamətlərdə sürətli inkişaf yolunda inamla irəliləyir. Təbii ki, hər bir inkişafın təməlində insan kapitalı, onun əsasında isə təhsil dayanır. Çünki hər bir dövlətin gələcəyi həmin ölkədə təhsilin səviyyəsi ilə ölçülür. Azərbaycanda təhsilin inkişafı dövlət siyasətinin prioritet istiqamətlərindən biridir.
Təhsil sahəsində önəmli islahatlar həyata keçirilir. Bu gün ölkəmizdə təhsilin daha da inkişafı üçün xeyli sayda dövlət proqramı icra olunur. Həyata keçirilən dövlət proqramları çərçivəsində təhsil təyinatlı yeni binalar inşa edilir, ümumi təhsil müəssisələrinin binaları əsaslı təmir olunur. Təhsildə informasiya-kommunikasiya texnologiyalarının tətbiqi genişlənib, bütövlükdə təhsilin infrastrukturu müasirləşir. Qeyd etdiyimiz kimi, təhsil təyinatlı yeni binalar inşa edilir, bəziləri isə təmir edilir. Ancaq elə məktəblər də var ki, hələ də təmirsiz, istifadəyə yararsız vəziyyətdədir. Bu hal Tovuz rayonu, şəhid Elşad Orucov adına Bayramlı kənd tam orta məktəbində müşahidə olunur. 48 il öncə istismara verilmiş bu təhsil ocağı hər an uçub-dağılmaq təhlükəsi ilə üz-üzədir.
200 şagird yerlik ikimərtəbəli binadakı istismara yararsız dam örtüyü, qəzalı vəziyyətdə olan döşəmə, çatlarla sütundan aralanan divarlar, hörümçək toruna bənzəyən elektrik naqilləri, sınmış pəncərə və qapılar potensial təhlükə mənbəyidir.
Valideynlər qeyd edir ki, artıq məktəbdə hissə-hissə uçma halları da qeydə alınıb. Bu isə xoşagəlməz hadisələrlə nəticələnib: “Məktəbin mövcud vəziyyətindən narahatıq. Artıq bu vəziyyətə görə çoxlu sayda şagird başqa təhsil ocaqlarına üz tutub”.
“Şəhidin adına hörmət olaraq o məktəb qısa müddətdə təmir olunmalıdır”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, hazırda ölkəmizdə ən müasir standartlara cavab verən təhsil müəssisələrinin yaradılması istiqamətində işlər davam etdirilir. Buna baxamayaraq, bəzi ucqar ərazilərdə olan təhsil müəssisələrinin vəziyyəti ürəkaçan deyil: “Ölkəmizdə 4430 məktəb mövcuddur, amma onlardan təxminən 1000-ə yaxınının əsaslı təmirə ehtiyacı var. Xüsusilə də ucqar kəndlərdə bu tip təhsil ocaqlarına daha çox rast gəlinir. Həmin məktəblərin təmiri ilə bağlı dövlət tərəfindən müvafiq proqramlar həyata keçirilir. Hər il ölkə başçısının sərəncamı ilə modul tipli məktəblər tikilir. Bu modul tipli məktəblərin ən azından təmirsizlər bərpa olunana kimi istifadəsi mümkündür. Həmçinin modul tipli məktəb formasında tədrisin davam etdirilməsi nəzərdə tutulur. Ancaq aidiyyəti qurumlar bağçaların, təhsil müəssisələrinin vəziyyəti ilə daim maraqlanmır, onları nəzarətdə saxlamır. Təmirə ehtiyacı olan məktəblər nəzarətə götürülməlidir. Bu işə səhlənkar yanaşmaq olmaz. Nəzərə almaq lazımdır ki, Tovuzda istifadəyə yararsız vəziyyətdə olan təhsil müəssiəsi şəhid adını daşıyır. Şəhidin adına hörmət olaraq o məktəb qısa müddətdə təmir olunmalıdır”.
Günel CƏLİLOVA
