Azərbaycanda son illər təhsilin keyfiyyətinin yüksəldilməsi, məktəb direktorlarının, digər rəhbər şəxslərin dəyişdirilməsi, imtahanla seçilməsi prosesi gedir. Ancaq, xüsusilə direktorlarla bağlı məsələ həllini tapmır və bunun dərin səbəbləri olduğu üzə çıxır.
Məktəb direktoru və onun müavinlərinin təyinatı ilə bağlı yaranan problemlərə son qoymaq üçün bu vəzifəyə işə qəbul müsabiqə və müsahibə formatında həyata keçirilir.
Araşdırmalar zamanı məlum olub ki, çox zaman test imtahanını uğurla başa vuran müəllimlərin əksəriyyəti müsahibə mərhələsindən keçə bilmir. Maraqlıdır, direktorluğa nazmiəd olan şəxslər nə üçün müsahibə mərhələsini uğurla başa vura bilmir?
“Müsahibə mərhəsində iştirak edən şəxslərin zəif nəticə göstərməsinin səbəbi onların dünyagörüşünün zəif olması ilə bağlıdır”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, Elm və Təhsil Nazirliyində ümumi təhsil müəssisələrinin direktoru vəzifəsinə işə qəbul və direktorların yerdəyişməsi qaydaları bir neçə ildir ki, yeni formatda həyata keçirilir. Tətbiq edilən yeni qaydalara əsasən, ümumi təhsil müəssisələrinin vakant olan direktor vəzifələrinin tutulması üçün Təhsil Nazirliyi tərəfindən mərkəzləşdirilmiş qaydada müsabiqə keçirilir. 4 mərhələdən ibarət olan müsabiqəni uğurla keçənlər sonda bu vəzifəyə təyin olunurlar: “Direktor vəzifəsinin tutulması üzrə müsabiqədə pedaqoji və ya idarəetmə sahəsi üzrə ali təhsili olan, azı 5 il pedaqoji staja malik hər bir şəxs iştirak edə bilər. Qeyd olunan göstəricilərə malik olan istənilən şəxsə müsabiqədə iştirak üçün qeydiyyatda olduğu və ya faktiki yaşadığı rayon (şəhər) məktəblərinin vakant olan direktor vəzifəsini seçə bilmək hüququ verilib. Bundan başqa, əlavə olaraq, “Ümumi təhsil müəssisələrində rəhbər vəzifələrə namizədlərin müəyyənləşdirilməsi üzrə təlim kursları”nın əhatə etdiyi rayon və şəhərlərdə direktorların işə qəbulu üzrə müsabiqəyə bu kursları bitirərək “Uğur sertifikatı” əldə etmiş şəxslər müsabiqənin üçüncü mərhələsindən (imtahan) azad edilərək, birbaşa dördüncü mərhələyə (müsahibə) keçirlər. Müsahibə mərhəsində iştirak edən şəxslərin zəif nəticə göstərməsinin səbəbi onların dünyagörüşünün zəif olması ilə bağlıdır. Müsahibə mərhələsi zamanı idarəçilik bacarıqları ortaya qoyulmalıdır. Direktor vəzifəsi üzrə müsahibədə geniş dünyagörüşə malik müəllimlər iştirak etməlidir”.
Ekspert hesab edir ki, direktorluq üzrə müsahibədə iştirak edənlərin ən böyük səhvi odur ki, şəxsi inkişafla bağlı ədəbiyyat və dərs vəsaitləri oxumurlar. Sualları düşündükləri formada deyil, komissiya heyətinə xoş görünsün deyə cavablandırırlar. Ancaq nəticə göz qabağındadır.
Günel CƏLİLOVA
