İkinci Qarabağ müharibəsində Vətən və millət yolunda müqəddəs şəhidlik zirvəsinə ucalan Lənkəranın qəhrəman oğlanlarının şərəfli həyat yolları örnək götürülməklə onlar hər an ehtiramla xatırlanır və adları ilə bağlı layiqli işlər görülür. Bu günlər isə Lənkəran Şəhər İcra Hakimiyyətinin başçısı Taleh Qaraşov, icra aparatının rəsmi şəxsləri, rayon ictimaiyyətinin nümayəndələri və şəhid ailələrinin üzvləri Vətən sevdalıları Samir Quliyevin, Vüsal Quliyevin məzarlarını ziyarət ediblər. Lənkəran şəhər və Velədi kəndində gerçəkləşən ziyarət zamanı qəbiristanlıqdakı bütün şəhidlərin məzarları önünə gül dəstələri düzülüb, xatirələri ehtiramla anılıb.
Çıxışlar zamanı bildirilib ki, Vətən müharibəsinin şəhidləri öz qanları bahasına qəhrəmanlıq salnaməsi yazaraq xalqımıza şanlı qələbə sevincini yaşatdılar. Onların hər biri xalqın qəlbində özlərinə əbədi bir ömür qazandılar. Biz 30 il düşmən tapdağında olan Vətən torpaqlarını azad edib zəfərlə dolu yeni tarix yazan Samir, Vüsal kimi oğullara borcluyuq.
Sonra Taleh Qaraşov şəhidlərin ailə üzvləri ilə söhbət edib, qayğı və problemləri ilə yaxından maraqlanıb. Şəhid ailələri də öz növbələrində onlara göstərilən diqqət və qayğıya görə dövlət başçısı cənab İlham Əliyevə və Birinci vitse-prezident Mehriban xanım Əliyevaya təşəkkür ediblər.
Şəhid Vüsal Tahir oğlu Quliyev 1985-ci il iyunun 6-sı Lənkəran şəhərində dünyaya göz açıb. Orta təhsilini baca vuran il Heydər Əliyev adına Azərbaycan Ali Hərbi Məktəbinə qəbul olub. 2007-ci ildə məktəbi leytenant kimi bitirən gənc zabitimiz Gəncə, Ağstafa, Ağcabədi, Beyləqan, Goran və Tərtərdə yerləşən hərbi hissələrdə doğma Azərbaycanın keşiyində durub. Valideynləri Vüsalı həkim görməyi arzulasalar da, o, nümunəvi xidmət zamanı sevdiyi hərb sənətinin sirlərinə dərindən yiyələnib. Kapitan rütbəsinə qədər yüksəlib.
Kapitan Vüsal Quliyev Vətən müharibəsinin ilk günündə işğalçı Ermənistan ordusunun növbəti təxribatlarına qarşı əks hücum əməliyyatı keçirən Rəşadətli Ordumuzun sıralarında öz şəxsi heyəti ilə birlikdə düşmənə qarşı mərdliklə vuruşur. Otuz beş yaşında Suqovuşanın azad olunması uğrunda gedən döyüşlərdə şəhid olaraq əbədiyyət adlı dünyasına qovuşub.
Vüsal Quliyev hələ sağlığında dövlət başçısının Sərəncamı ilə “Azərbaycan Ordusunun 100 iliyi” yubiley medalına layiq görülüb. Ölümündən sonra isə 3-cü dərəcəli “Rəşadət” ordeni, “İgidliyə görə”, “Vətən uğrunda”, Füzulinin və Qubadlının azadlığına görə medalları ilə təltif olunub.
İgid zabitimizin Vətənə əmanət qoyduğu iki qız, bir oğlan övladı var.
19 yaşında adını qəhrəmanlıq salnaməsinə yazdıran Samir Məhərrəm oğlu Quliyev 2001-ci il noyabrın 25-də Lənkəran rayonu, Velədi kəndində anadan olub. İkinci Qarabağ müharibəsi başlananda ordu sıralarında olub və ilk gündən Vətən torpaqların azad edilməsi uğrunda ölüm-dirim savaşına qatılır. Füzuli istiqamətində gedən döyüşlər zamanı böyük şücaət göstərərək şəhadətə yetir.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamlarına əsasən Samir Quliyev ölümündən sonra “Vətən uğrunda”, “Cəsur döyüşçü” və digər medallara layiq görülüb.
Zəfər ORUCOĞLU Azərbaycan Jurnalistlər Birliyinin üzvü
