Şəhidlərin taleyi başqalarının taleyinə bənzəməz. Onlar doğulduqları gündən şəhid olduqları günə qədər Tanrının nəzərində olurlar, şəhidlik anına qədər Allah onları qoruyur.
Şəhidlər haqda yazmaq, danışmaq, onları tanıtmaq çox vacib bir işdir. Analarını gözüyaşlı qoyub Vətənin üzünü güldürən oğullardan biri də Vətən müharibəsinin şəhidi Bayramov Cavid Azər oğludur.
Cavid gerçək bir qəhrəmandır və həyatı, döyüş yolu örnək olan bir qəhrəman. Vətəni ayaqda saxlamaq üçün canından keçən Cavid kimi oğullar heç vaxt unudulmur, yaddan çıxmır, onlar həmişə yaşayır.
Ailəsindən verilən məlumata görə,
1997-ci ilin 29 iyununda doğulan qəhrəmanımız oktyabrın 8-i Füzuli uğrunda aparılan döyüşlərdə şəhidlik məqamına ucalıb. Füzuli uğrunda gedən döyüşlər çox çətin və ağır döyüşlər olub, qəhrəman əsgər və zabitlərimiz keçilməz beton sədləri yarıb qəhrəman ordumuza yol açıb. Cəbhəyə yola açanlardan biri kimi Cavidin də döyüş yolu çox zəngin və mənalıdır.
Cavid Azərbaycan Texniki Universitetinin məzunu olub. Mühəndis ixtisasına sahib olan Cavid müharibəyə könüllü qatılıb. 27 sentyabrda Ordumuzun başlatdığı əks-hücum əməliyyatlarına könüllü qatılanlardan biri də Cavid Bayramov olub. Tanrı ona şəhidlik bəxş edib. 23 yaşında şəhidlik badəsi içən Cavidin uğrunda canını verdiyi vətən torpaqları artıq tamamilə işğaldan azad edilib, düşmən ağ bayraq qaldırıb. Şəhid olduqdan sonra Vətən uğrunda, Cəbrayılın və Füzulinin azad olunmasına görə medalları ilə təltif olunub. Üç medal qalıb ondan, qəhrəmanlıq dolu həyatının xatirələrə köçən anları yaşayır yaddaşlarda. Ata-anasının, doğmalarının gözü yaşla dolsada da, o yaşın içində qürur adlı bir məfhum gizlənib. Cavidin ailəsi şəhid övladının unudulmamasını istəyir. Çünki digər şəhid ailələri kimi Bayramovlar ailəsinin də tək təsəllisi budur - övladlarının daim xatırlanması… Cavidin ailəsi bilməlidir ki, şəhidlər unudulmur, onlar əbədiyyən diridirlər...
Üç il əvvəl şəhid olan qəhrəman Cavidin izləri bu torpağın, bu vətənin yaddaşında həmişə yaşayacaq. Cavidin ruhu qanı tökülən torpaqda açılan al lalələrə hopub hər bahar yenidən qayıdacaq...
Sən həmişə yaşayırsan əziz şəhidimiz, sən həmişə sağsan.
Ruhun şad olsun
İradə SARIYEVA
