Mən yer üzündə müəllimdən yüksək ad tanımıram Heydər ƏLİYEV
Həmişə müəllim haqqında çox gözəl sözlər deyilib, müxtəlif ifadələr səslənib. “Müəllim heç kimə fərq qoymadan hamıya eyni dərəcədə ziya paylayan günəşə bənzəyir”. Keçib gəldiyimiz yola dönüb baxanda o yolun başlanğıcında bizə doğma, müqəddəs, xeyirxah müəllimləri görürük.
Müəllim ifadəsi özündə bir çox gizli mətləbləri açır, şagirdlərə bəlli olmayan dünyaları müəllim öz “sehri” ilə göstərir. Bunun üçünsə gərəkli olan onun dünyagörüşünə, savada və vicdana sahib olmasıdır. Əgər bu keyfiyyətlər müəllimdə varsa sözsüz ki, uğurlu gələcək yetişəcəkdir.
Neçə yaşda olsaq belə müəllimin sevgisi, qayğısı unudulmur. Məlumatı kitablardan alırıq, onu bilik halına çevirənsə müəllimin zəhmətidir. Azərbaycanın tanınmış maarif xadimi, müəllim, yazıçı, tərcüməçi, jurnalist, bir sıra lüğətlər, dərsliklər, bədii əsərlər, felyatonlar müəllifi Sultan Məcid Qənizadənin sözləri də bunu təsdiqləyir: “Müəllimlik dünyanın ən nəcib peşələrindən biri, bəlkə də birincisidir. Bağ bağbansız keçinə bilmədiyi kimi, bəşəriyyət də müəllimsiz keçinə bilməz... Hünərli usta dəmirdən səbir ilə misri qılınc yona bildiyi kimi, yaxşı müəllim də kəctab millətdən xoşbəxt cəmiyyət hazırlayır”.
Bu yazdığım dəyərlərə uyğun olan müəllimlərdən biri də Yeganə Cabbar qızı Məmmədovadır. O, 1981-ci ildə Bakı şəhərində anadan olmuşdur. Nərimanov rayonu 82 nömrəli tam orta məktəbdə təhsil aldıqdan sonra 1998-ci ildə Azərbaycan Dövlət Pedaqoji Universitetinin İbtidai təhsilin pedaqogikası və metodikası fakültəsinə daxil olmuşdur. 2008-ci ildən Abşeron rayonu Xırdalan şəhəri 2 nömrəli tam orta məktəbdə fəaliyyətə başlamışdır. Paralel olaraq 2013-2018-ci illərdə Xırdalan şəhərində yerləşən “Zirvə” liseyində ibtidai sinif müəllimi kimi çalışmışdır. Həmin liseydə, həmçinin ibtidai siniflər üzrə metodbirləşmə vəzifəsini də icra etmişdir.
2015-ci ildə müəllimlərin diaqnostik qiymətləndirilməsi imtahanından yüksək bal toplamışdır. Hazırda Xırdalan şəhər 11 saylı tam orta məktəbdə fəaliyyətini uğurla davam etdirir.
Müəllim insanlar topluluğundan müasir xalq yaradan, onları maarifləndirərək özünə hörmət qazanmış, düşüncəsi, vicdanı azad nəsillər yetişdirən qəhrəmandır. Bir xalqın, hətta bütün bəşəriyyətin gələcəyə inamla addımlamasını təmin edən yeganə element müəllimdir. Bu səbəbdən də Yeganə müəllimənin əməyi danılmazdır.
Övladlarımızın yetişməsində böyük rol oynayan, hər cür fədakarlıq göstərən Sizə - Yeganə müəlliməyə və Sizin timsalınızda bütün müəllimlərə çox şey borcluyuq. Müəllimlərin peşə bayramı münasibətilə Sizi ürəkdən təbrik edir, uzun ömür, cansağlığı, təhsilimizin inkişafında uğurlar diləyirəm.
Müəllimlər gününüz mübarək!
Elşad Dağlı, "Cabir Novruz" Mədəniyyət Fondu mətbuat xidmətinin rəhbəri, Azərbaycan Yazıçılar və Jurnalistlər Birliklərinin üzvü.
