"Azərbaycanda qadın hüquqları ilə bağlı 200-ə yaxın qeyri-hökumət təşkilatı (QHT) mövcuddur, amma bu təşkilatlar fəal deyil və fəaliyyətləri keyfiyyətsizdir". Bunu Ailə, Qadın və Uşaq Problemləri üzrə Dövlət Komitəsinin Hüquqi-təminat şöbəsinin müdiri Taliyə İbrahimova deyib.
O qeyd edib ki, bəzi təşkilatlar qadın hüquqları sahəsində fəaliyyətlərin asan olduğunu düşünür: “Lakin onların çoxunun BMT-nin qadın və uşaq hüquqları ilə bağlı sənədlərindən, dövlət qanunlarından xəbərləri yoxdur. QHT-lərin qrant almaq üçün təqdim etdikləri layihələrdə çatışmazlıqlar çox olur. Onlar bir sıra sənədlərdən məlumatsızdırlar".
Maraqlıdır, qadın hüquqları ilə bağlı QHT-lərin fəaliyyəti niyə qənaətbəxş deyil? Ümumiyyətlə, bu sahədə hansı problemlər var?
“Qadın hüquqlarını qoruyan, onların problemlərini həll etməyə çalışan aktiv vətəndaş cəmiyyətlərinin sayı elə də çox deyil”
''Yeni Həyat'' İB-nin sədri Nailə İsmayılova “Bakı-Xəbər”ə açıqlamasında qeyd etdi ki, bu gün qadın hüquqlarının müdafiəsi ilə məşğul olan QHT-lərin sayı kifayət qədərdir: “Bu sahədə fəaliyyət göstərən QHT-lərin sayı yetərincə olsa da, görülən işlərin statistikası göstərir ki, hələ də qadınlarımıza qarşı cəmiyyətimizdə ayrıseçkilik var, qız uşaqlarının öz doğmaları tərəfindən təhsildən kənarlaşdırması halları, erkən nikaha məcburetmə, məişət və gender əsaslı zorakılıq halları davam edir. Bununla yanaşı, yeni doğulan körpələr arasında qızların sayı azalır. Bununla bağlı həyəcan təbili çalmağın vaxtı çoxdan çatıb. Digər problem isə bizim cəmiyyətdə qadına qarşı seksual qısnamalar, qadının cins olaraq ancaq seksual alət kimi görülməsidir. Bu kimi problemlərin həll olunması üçün vətəndaş cəmiyyətlərinin üzərinə böyük yük düşür. Bəli, bu istiqamətdə fəaliyyət göstərməli olan QHT-lərin sayı çoxdur. Ancaq qadın hüquqlarını qoruyan, onların problemlərini həll etməyə çalışan aktiv vətəndaş cəmiyyətlərinin sayı elə də çox deyil”.
N.İsmayılova hesab edir ki, qadın hüquqları ilə bağlı maarifləndirmə işinin təşkilində və ailələrlə işin keyfiyyətinin artırılmasında yanaşma mexanizmi təkmilləşdirilməlidir.
Günel CƏLİLOVA
