Bu gün Azərbaycan polisi, sözün həqiqi mənasında, xalqın güvənc yerinə çevrilib. Ailədaxili münaqişədən tutmuş, təbii hadisələrə qədər insanlar üzləşdikləri hər bir problemə görə ilk olaraq polisə üz tuturlar. Bu da insanların polisə bəslədiyi inam və etibarın göstəricisidir. Sirr deyil ki, ölkəmizdə ictimai asayişin qorunmasında, təhlükəsizliyin, sabitliyin təmin olunmasında polisin müstəsna rolu var.
Elə bu səbəbdən də polislərin maaşlarının artırılması üçün paket şəklində əlavənin verilməsi ilə bağlı qanuna dəyişiklik edilməsi təklif edilir.
Bu təkliflə deputat Fəzail Ağamalı Milli Məclisin iclasında müzakirə edilən “Polis haqqında” qanuna dəyişikliyin müzakirəsi zamanı çıxış edib.
O qeyd edib ki, polislərin sosial durumunun yaxşılaşdırılması üçün addımlar atılmalıdır : “Gələcəkdə polislərin əməkhaqqının artırılması üçün paket şəklində qanunlar qəbul edilməlidir".
Ölkə ictimaiyyəti asayişin qorunmasında rolu olan polislərin əmək haqlarının artırılmasının tərəfdarıdır.
“Vətəndaşlar polisin fəaliyyətdən məmnundur, bunun müqabilində onların həyat şəraiti də yaxşılaşdırılmalıdır"
"Polisə Dəstək" İctimai Birliyinin sədri Şəmsəddin Əliyev “Bakı-Xəbər”ə açıqlamasında qeyd etdi ki, polis heç bir dövlət qurumuna xas olmayan səlahiyyətləri həyata keçirir: "Polis - spesifik bir sahədir. Polisə güc strukturu da demək düz deyil. Çünki polis 24 saat ərzində vətəndaşların təhlükəsizliyini təmin edir. Dövlət, şəxsi əmlakı polis qoruyur. Dövlətçilik əleyhinə yönələ biləcək cəhdlərin qarşısını alır. Bu peşə fəaliyyəti ilə məşğul olanlar davamlı olaraq ölkənin sabitliyini təmin edir. Bu səbəbdən də onların əmək haqları artırılmalıdır. Xatırladım ki, 1991-ci ildə Azərbaycanın müstəqilliyi bəyan edildikdən sonra bir sıra xarici ölkələrin diplomatik korpusu Bakı şəhərində fəaliyyət göstərməyə başladı. Beləliklə, bunların kontingentlərinin sayı artdı. Onlar ölkədə təhlükəsizliyin, sabitliyin necə təmin olunmasını yaxşı görür, müşahidə edir. Diplomatik korpusun əməkdaşlarının, onların ailələrinin təhlükəsizliyi Azərbaycan polisi tərəfindən yüksək səviyyədə təmin olunur".
Ş.Əliyev bildirdi ki, Avropa ölkələri ilə müqayisədə cinayətlərin sayına görə Azərbaycan yaxşı mənada irəlidədir. 100 min əhaliyə 200-250 cinayət düşür. Əhalisi Azərbaycandan qat-qat artıq ölkələrdə isə 100 min əhaliyə 3000-6000 cinayət hadisəsi qeydə alınır: "Onu da nəzərə almaq lazımdır ki, Avropa ölkələrində çalışan polislərin əmək haqqı və texniki təminat sarıdan problemləri yoxdur. Ancaq bizdə vəziyyət onlarla müqayisədə fərqlidir. Həmçinin, Azərbaycanda çalışan sahə müvəkkili təxminən 4000-5000 adama xidmət edir. Xarici ölkələrdə isə sahə müvəkkili ən çox 2500 adama nəzarət edir".
Həmsöhbətimiz onu da əlavə etdi ki, Sovet dönəmində 10 -15 il polis fəaliyyəti ilə məşğul olanlar pulsuz mənzillə təmin olunurdu. Təəssüf ki, bu gün belə bir qayda yoxdur: "Polislərin ev problemi, uşaqlarının təhsil, səhiyyə və gündəlik xərcləri onların əmək haqları ilə uzlaşmır. Polisin heç bir şeyə ehtiyacı olmamalıdır. Çünki o, 24 saatın yalnız 8 saatını ailəsinə, qalan vaxtları isə öz xidməti vəzifələrini icra etməyə sərf edir. Bu səbəbdən də onların həyat şəraiti yaxşılaşdırılmalıdır".
Ekspertin sözlərinə görə, polisin əmək haqqının artırılmasına mane olan qüvvələr var: "Bu qüvvələr bəzən polisə qısqanclıqla yanaşır. Ölkə başçısı İlham Əliyevin müdrik bir kəlamı var: "polisə hörmət, dövlətə hörmətdir". Polisə qısqanclıqla yanaşmaq, onları saymamaq dövlətə qarşı çıxmaq deməkdir. Nəzərə almaq lazımdır ki, bizim təhlükəsizliyimiz yalnız bu xidmət sahəsində çalışan şəxslərin narahat gecələri hesabınadır. Bu səbəbdən də hesab edirəm ki, gərgin fəaliyyətlə məşğul olan polislərin əmək haqqı 3 dəfə artmalıdır.
Bədbəxt hadisələr olur - polis xilaskar kimi davranır. Hamilə qadını xəstaxanaya çatdırır, alovun ağzından cocuğu alıb valideyninə qaytarır və s... Belə qürur duyduğumuz vəzifə sahiblərini gördükdə “borcudur, polis elə belə də olmalıdır”-deyirik. Polisimiz bizi qoruyur. Biz istəsək də, istəməsək də, bu onların vəzifə funksiyası, vətəndaş borcu və konstitusion vəzifəsidir. Cəmiyyət olaraq biz də onlara dəstək olmalıyıq. Nəzərə almaq lazımdır ki, polis işinə, xidmətinə kifayət qədər vicdanla ədalətlə yanaşır. Azərbaycan xalqının təhlükəsizliyi təmin edilir. Vətəndaşlar polisin fəaliyyətdən məmnundur. Bunun müqabilində onların həyat şəraiti də yaxşılaşdırılmalıdır".
Birlik sədrinin sözlərinə görə, bəşəriyyətin artıq alışdığı və təmasda olduğu Polis bir sıra vacib funksiyaları yerinə yetirir. Cəmiyyətin təhlükəsizliyinin təmin edilməsi, ictimai asayişin və qaydaların qorunması, müəyyən olunmuş davranış qaydalarına riayət etmək polisin vəzifəsi kimi qəbul edilir: “Polis əməkdaşları xidmət etdiyi ərazidə vəzifə funksiyalarının icrası məqsədilə çox iş görür. O, küçədə patrul xidmətini həyata keçirir. Şübhəli davranışlı şəxsləri nəzarətdə saxlayır, baş vermiş hadisələrdən vətəndaşların həyatını və əmlakını müdafiə edir. Aşkar hadisələrə çevik reaksiya verməklə müvafiq tərkibdə hadisə yerinə gəlir, qeyri-aşkar şəraitdə baş vermiş hadisələrin açılması üçün kəşfiyyat xarakterli sorğular aparır, hadisə yerinin mühafizəsini təşkil edir, şəraiti dəyərləndirir, situasiyanı tənzimləyir və təhlükəsizliyi təmin edir”.
Ş.Əliyev son olaraq onu da bildirdi ki, müharibə zamanı polis əməkdaşları ölkəmizdə, o cümlədən işğaldan azad edilən ərazilərdə təhlükəsizliyin təmin olunmasında mühüm rol oynayıb, bu mühüm məsələnin əsas məsuliyyəti məhz onların üzərinə düşüb. Bu gün də Azərbaycan polisi işğaldan azad edilmiş ərazilərdə öz xidmətini yüksək səviyyədə həyata keçirir, təhlükəsizliyimizi möhkəmləndirir.
Günel CƏLİLOVA
