Azərbaycan Respublikası Mədəniyyət Nazirliyi Respublika Xatirə Kitabı redaksiyası yarandığı gündən indiyə qədər saysız uğurlu layihələr gerçəkləşdirib, cildliklər, kitablar nəşr edib, Bakıda və bölgələrdə onların təqdimatlarını, ictimai müzakirəsini keçirib.
Respublika Xatirə Kitabı redaksiyasının növbəti tədbirlərdən, təqdimatlarından biri də 29 sentyabr tarixində M.F.Axundov adına Azərbaycan Milli Kitabxanasının Böyük Akt zalında keçirildi. Belə ki, “44 gün – Tarixi zəfər” adlı kitabın F-L hərfləri üzrə II cildinin təqdimat mərasimi keçirildi.
Təqdimat mərasimini Azərbaycan Mətbuat Şurasının sədri Rəşad Məcid açaraq nəşr barədə məlumat verdi və bildirdi ki, Xatirə Kitabının bu yöndə gördüyü işlər misilsizdir.
Təqdimat mərasimində çıxış edən Respublika Xatirə Kitabı redaksiyasının baş redaktoru Nəzakət Məmmədova çıxışında indiyə qədər rəhbərlik etdiyi redaksiyada görülən işlərdən danışdı.
Qeyd etdi ki, kitab 44 günlük Vətən müharibəsində həlak olanların adlarının və xatirələrinin əbədiləşdirilməsi məqsədilə çap edilib. Kitabda 1000-ə yaxın şəxs haqqında ensiklopedik məlumat yer alıb.
N. Məmmədova məlumat verdi ki, müasir Azərbaycan dövlətinin qurucusu və memarı, ümummilli lider Heydər Əliyevin qayğısı və təşəbbüsü ilə yaradılmış, onun xeyir-duası ilə fəaliyyətə başlamış Respublika Xatirə Kitabı insan resurslarını əbədiləşdirən tarixi sənəd, tarixlə cəmiyyət arasındakı həqiqətləri, müharibə ağrılarını özündə geniş əks etdirən ensiklopedik salnamədir. Bu kitabda İkinci Dünya müharibəsi, Əfqanıstan döyüşləri, 20 Yanvar faciəsi, Xocalı soyqırımı, Azərbaycanın ərazi bütövlüyü uğrunda gedən döyüşlərdə həlak olmuş, itkin düşmüş, əsir götürülmüş vətəndaşlarımız, Milli Qəhrəmanlarımız, Azərbaycanın ərazi bütövlüyü uğrunda şücaət göstərmiş şəxslər haqqında əhatəli materiallar dərc edilir.
Respublika Xatirə Kitabının indiyədək iyirmiyə yaxın cildi çap olunub. Redaksiya əlavə olaraq, itkin düşmüş, əsir götürülmüş vətəndaşlarımız haqda 4 cildlik kitab hazırlayıb, onlardan 3-ü çap olunub, 4-cü cild çapa hazırdır. Eyni zamanda, redaksiya 44 günlük Vətən müharibəsində şəhid olmuş şəxlərin adlarının və xatirələrinin əbədiləşdirilməsi məqsədilə bir neçə cildlik kitab üzərində çalışır. Kitabın artıq 1-ci və 2-ci cildi işıq üzü görüb, 3-cü cild üzərində işlər aparılır. Bu çoxcildlik ensiklopedik nəşrlər ictimai müstəvidə xüsusi rol oynayır.
N.Məmmədova qeyd etdi ki, Respublika Xatirə Kitabı redaksiyası həmçinin, “Bakı Xəbər” qəzeti ilə birgə layihəsi əsasında “Şəhidlər ölməz, Vətən bölünməz!” silsiləsindən 44 günlük Vətən müharibəsində həlak olanların adlarının və xatirələrinin əbədiləşdirilməsi məqsədilə bir neçə kitab nəşr edib, həmin kitabların təqdimatını keçirib. Redaksiya, eyni zamanda, «Vətən daşı... və ya 44 günün dastanı» adlı layihə əsasında 8 sənədli film çəkib. Bu filmlərin 4-ü geniş ictimaiyyətə təqdim olunub. Qeyd edək ki, layihənin rəhbəri Nəzakət Məmmədovadır.
Təqdimat mərasimində Müdafiə Nazirliyinin, Daxili İşlər Nazirliyinin, Hərbi Prokurorluğun və başqa dövlət qurumlarının nümayəndələri, şəhid anaları, şəhid ailələri iştirak edirdi.
Tədbirdən geniş yazını növbəti sayımızda təqdim edəcəyik
İradə SARIYEVA
