Bina sakinlərinin "Zaman" EİM-dən tələbi - 8 ildir ala bilmirik...
Binəqədi rayonu, Mirmahmud Kazımovski 54/56 ünvanının sakinlərinin həyatı təhlükə altındadır. Sakinlər qeyd edir ki, yaşadıqları bina 2015-ci ildə tikilib təhvil verilsə də, 8 ildən artıqdır ki, tikintini həyata keçirən “Zaman” Elmi-İstehsalat Müəssisəsindən (EİM) onu təhvil ala bilmirlər:
“Həyətimizdə sakinlərin ümumi mülkiyyətinə verilməli olan ofis qanunsuz yollarla şirkət tərəfindən ələ keçirilib. Bütün binanı içməli su ilə təmin edən anbarın üzərində yerləşən ofisin təyinatı dəyişdirilərək yaşayış obyekti edilib, Anbara giriş və havalandırma sistemi bağlanıb. Hazırda ərazidə yaşayan 850 sakinin həyatı təhlükə atındadır. Binanın həyətindəki ofis 600 kubmetrlik su anbarı və nasosxananın üzərində tikilib. Ərazinin təhlükəsizlik kamerası, komendant və iclas otağı bu ofisdə yerləşir. “Zaman” EİM tikinti şirkətinin rəhbərliyi həmin ofisə saxta yolla çıxarış alıb. Əvvəlcə həmin obyekti kafe kimi işlətmək istəyirdilər, hazırda isə yaşayış yeri kimi istifadə olunur. Hətta həmin ofis binasına arxa tərəfdən giriş qapısı açıblar. Su anbarının havalandırma yeri və giriş-çıxış qapısı tutulub. Biz anbara daxil ola bilmirik, bunun üçün onlardan icazə alıb içəri girməliyik. Bu günlərdə su anbarı daşmışdı, onlar da yatmışdılar deyə içəri girə bilmədik. Su boşuna axıb getdi. Ən dəhşətlisi odur ki, həmin yerdə ev heyvanları da saxlayırlar. Bir neçə it və tısbağalar su anbarının girişində, havalandırma sisteminin üzərində gəzirlər. Həmçinin obyektdə hamam, tualet də var ki, oradan anbara çirkab suların sızma ehtimalı var. Qanunvericiliyə görə, sanitar qovşaq, mətbəx içməli su anbarının üzərində yerləşə bilməz. Hazırda çox təhlükəli vəziyyət yaranıb”.
- Binəqədi RİH: “Binaların qaz, su, işıq və istilik xətti ilə təchiz olunmasına baxmayaraq, sayğaclaşdırma işlərinin başa çatdırılmaması və binaların idarə edilməsi ilə bağlı sakinlərlə müəssisə arasında mübahisə yaranıb”
Məsələ ilə bağlı Binəqədi Rayon İcra Hakimiyyətindən bildirildi ki, adıçəkilən binalarda yaşayan sakinlərin yuxarı dövlət qurumlarına və Rayon İcra Hakimiyyətinə ünvanladıqları əvvəlki müraciətləri əsasında ərazidə araşdırma aparılıb. Araşdırma zamanı binaların qaz, su, işıq və istilik xətti ilə təchiz olunmasına baxmayaraq, sayğaclaşdırma işlərinin başa çatdırılmaması və binaların idarə edilməsi ilə bağlı sakinlərlə müəssisə arasında mübahisənin yarandığı məlum olub: “Sakinlər Rayon İcra Hakimiyətinə dəvət olunub və “Zaman” EİM ilə razılaşdırılaraq bağlanmış müqavilə öhdəlikləri ilə bağlı aralarında yaranmış mübahisəli məsələlərə aydınlıq gətirilməsi üçün aidiyyəti üzrə məhkəməyə müraciət etmələri, kommunal xidmətlərin dəyərinin ödənişində mövcud olan problemlərin araşdırılması və hüquqlarının bərpası barədə qanunvericiliyin tələbləri ətraflı izah edilib”.
- Elxan Əliyev: “Sakinlərin iddia etdikləri problemlər aidiyyəti qurumlar tərəfindən araşdırılmalıdır”
Sosial sahə üzrə ekspert Elxan Əliyev bildirdi ki, bu kimi problemlər əksər yeni tikililərdə müşahidə olunur: “Sakinlərin iddia etdikləri problemlər aidiyyatı qurumlar tərəfindən araşdırılmalıdır. Yaxşı olar ki, sakinlər tikintini həyata keçirən şirkəti məhkəməyə versin. Belə olarsa tikinti şirkətləri binanın ərazisini kimə gəldi satmaz, ancaq sakinlərin təhılükəsizliyini düşünər. Təəssüf ki, bu gün sahibkarları qazanc maraqlandırır, insan canı yox”.
Əli TURABOV
