Məktəblərdə ərəb dilini dərsliksiz "öyrənirlər" - Bakıda beləsi də var...
Paytaxtda bəzi orta məktəblərdə ərəb dili tədris olunur. Ancaq dərs tədris olunsa da, şagirdlərə məktəb tərəfindən kitab verilmir.
Qeyd edək ki, Bakıda ərəb dili dərsliyini yalnız bir mağazadan almaq mümkündür. Valideynlər həmin kitabı 12 manatdan almağa məcburdur. Müəllifi Çinarə Köçərli olan ərəb dili dərsliyi heç Elm və Təhsil Nazirliyi tərəfindən də təsdiq olunmayıb.
- Elm və Təhsil Nazirliyi: “Növbəti illərdə ikinci xarici dil kimi ərəb dili dərsliklərinin də hazırlanması nəzərdə tutulur”
Məsələ ilə bağlı Elm və Təhsil Nazirliyindən bildirildi ki, hazırda ərəb dili 9 ümumi təhsil müəssisəsində tədris olunur: "Bunlardan birində ərəb dili birinci xarici dil kimi, digər 8 məktəbdə isə ikinci xarici dil kimi tədris edilir. Birinci xarici dil kimi I – V siniflər üçün dərsliklərin rəqəmsal versiyaları ilə trims.edu.az portalında tanış ola bilərsiniz. İkinci xarici dil üzrə dərsliklərin hazırlanması prosesinə nisbətən gec başlanılmışdır. Növbəti illərdə ikinci xarici dil kimi ərəb dili dərsliklərinin də hazırlanması nəzərdə tutulur".
- Kamran Əsədov: “Ərəb dili tədris olunan məktəblərimizə çox nadir hallarda rast gəlinir”
Təhsil eksperti Kamran Əsədov bildirdi ki, orta ümumtəhsil məktəblərində xarici dilin tədrisi iki istiqamətdə - əsas və ikinci xarici dil olaraq keçirilir. Əsas xarici dil birinci sinifdən, ikinci xarici dil isə beşinci sinifdən tədris olunur. Tədris planına dair qeydlərdə də göstərildiyi kimi, istər əsas, istərsə də xarici dili seçim hüququ valideynlərə verilir: “Onlar müəyyən olunmuş dillər - ingilis, alman, fransız, rus, ərəb və fars dilləri arasında seçim etməkdə azaddırlar. Mövcud qanunvericiliyə əsasən, hətta valideynlərin seçimindən asılı olaraq, zərurət yaranarsa, eyni sinifdə iki xarici dil qrupu da təşkil oluna bilər. Ölkəmizdə daha çox tədris olunan xarici dillərə gəlincə, xarici dillərin öyrənilməsi ilə bağlı ümumi bir tələbat var. Bu tələbat istəsək də, istəməsək də, cəmiyyətin özü tərəfindən formalaşır. Hər birimiz bilirik ki, beynəlxalq aləmə əsas çıxış dili ingilis dilidir. Bu baxımdan ölkəmizdə xarici dillərin tədrisində əsas dil kimi ingilis dili çox böyük üstünlük təşkil edir. Təxmini hesablamalara görə, məktəblərimizdə birinci xarici dil kimi 90-95 faiz ingilis dili tədris olunur. Əsas xarici dil ingilis dili olan məktəblərdə isə ikinci xarici dilin daha çox rus dili olduğu müşahidə edilir. Təbii ki, ikinci xarici dil olaraq fransız, alman dilləri tədris olunan məktəblərimizə də rast gəlinir. Bundan başqa, əsas xarici dil fransız, alman dili olan məktəblərimiz də var. Lakin bu məktəblərin sayı çox azdır. Ərəb dili tədris olunan məktəblərimizə isə çox nadir hallarda rast gəlinir.
Günel CƏLİLOVA
