Son illər ölkəmizin təhsil sistemində aparılan islahatların keyfiyyət göstəriciləri təhsil müəssisələrinin infrastrukturunun yaxşılaşdırılması, yenilərinin inşası və əsaslı təmir olunaraq müəllim və təhsilalanların istifadəsinə verilməsi ilə sıx bağlıdır.
Məktəb, universitet və məktəbəqədər təhsil müəssisələrinin əsaslı şəkildə təmir olunaraq təhsilalanların ixtiyarına verilməsi qarşıya qoyulan əsas məqsədlərdən biridir. Bu sahədə görülən işlər göz qabağındadır. Lakin elə tədris ocaqları var ki, hələ də dağılmış vəziyyətdədir. Belə bir hal Abşeron rayonu, Ceyranbatan qəsəbəsi 2 nömrəli tam orta məktəbdə müşahidə olunur. Belə ki, bu məktəbin müəllimlər otağı, akt zalı, hərbi hazırlıq otağı, idman zalı, kitabxana və yeməkxanası yoxdur. Bu hal müəllim və məktəblilər üçün çətinlik yaradır.
Abşeron-Xızı Regional Təhsil İdarəsi: “2 nömrəli tam orta məktəbin həyətyanı sahəsində 660 şagird yerlik yeni korpusun tikintisi üçün…”
Məsələ ilə bağlı Abşeron-Xızı Regional Təhsil İdarəsindən bildirildi ki, Ceyranbatan qəsəbəsi 2 nömrəli tam orta məktəbin həyətyanı sahəsində 660 şagird yerlik yeni korpusun tikintisi üçün Elm və Təhsil Nazirliyinə təqdimat yazılıb və bunun Dövlət proqramına salınması nəzərdə tutulub.
Nizami Hüseynov: “Aidiyyəti qurumlar bağçaların, təhsil müəssisələrinin vəziyyəti ilə daim maraqlanmalıdır”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, hələ də təmirsiz, istifadəyə yararsız məktəblər var. Dövlət başçısı tərəfindən prioritet məsələ kimi məktəb tikintiləri əsas götürülsə də, təəssüf ki, nazirlik tərəfindən bu istiqamətdə işlər ləng aparılır: “4430 məktəb mövcuddur, amma onlardan təxminən 1000-ə yaxınının əsaslı təmirə ehtiyacı var. Xüsusilə də ucqar kəndlərdə bu tip təhsil ocaqlarına daha çox rast gəlinir. Dövlət bununla bağlı müvafiq proqramlar həyata keçirir. Hər il ölkə başçısının sərəncamı ilə modul tipli məktəblər tikilir. Bu modul tipli məktəblərin ən azından təmirsizlər bərpa olunana kimi istifadəsi mümkündür. Həmçinin modul tipli məktəb formasında tədrisin davam etdirilməsi nəzərdə tutulur”.
Ekspertin sözlərinə görə, nazirlik müvafiq olaraq bəzi layihələrin həyata keçirilməsi üçün vəsaitlər ayırır: “Təəssüf ki, bu kateqoriyaya aid olan məktəblərin təmirinə biganə yanaşılır. Şagirdlərin dərs oxumaq imkanları daha da yaxşılaşdırılmalıdır. Tədrisin təşkili və reallaşdırılmasına uyğun daha çox təhsil ocaqları olmalıdır. Onlar istilik sistemi ilə təmin olunmayan, əlverişsiz imkanlara malik siniflərdə təhsilini davam etdirə bilməyəcək. Bütün bunları müvafiq qurumlar nəzərə almalıdır”.
Ekspert xüsusi olaraq vurğuladı ki, aidiyyəti qurumlar bağçaların, təhsil müəssisələrinin vəziyyəti ilə daim maraqlanmalıdır. Təmirə ehtiyacı olan məktəblər nəzarətə götürülməlidir. Bu işə səhlənkar yanaşmaq olmaz.
Günel CƏLİLOVA
