Azərbaycan Ordusunun 44 günə zəfərlə bitirdiyi İkinci Qarabağ müharibəsində qəhrəmancasına şəhidlik zirvəsinə ucalan minlərlə Vətənin qeyrətli oğlanlardan biri də 21 sentyabr 2001-ci ildə Lerik rayonunun Mistan kəndində dünyaya göz açan, dağlar qartalı Çingiz Sulduz oğlu Babayevdir. Qisa ömür yolunda gələcək nəsillər üçün örnək olası bir tarix yazan bu, qəhrəman Vətən sevdalısı leriklilərin qəlbində yaşamaqla, hər an, hər yerdə ehtiramla xatırlanır.
Adəti üzrə 22 yaşı da igidin adına layıq qeyd olundu. Belə ki, Lerik Rayon İcra Hakimiyyətinin başçısının müavini Arzu Vəlimmədova, Yeni Azərbaycan Partiyasının Lerik rayon təşkilatının əməkdaşı Elman Rəcəbov, Ərazi Partiya Təşkilatının fəalları, kənd sakinləri və şəhidin ailə üzvləri Çingiz Babayevin uyuduğu müqəddəs məzarı ziyarət edib, önünə gül dəstələri qoydular.
Çıxışlar zamanı bildirildi ki, Vətənə məhəbbət Çingizin qanına ana südü ilə birgə hopmuşdu. O, düşmən tapdağında olan müqəddəs torpaqların azadlığı naminə canından keçməyə hazır idi. Bu ilahi sevgini ağır müharibə meydanında öz qanı bahasına sübut etməyi bacardı.
Məlumat üçün bildirək ki, Çingiz Babayev 2018-ci il oktyabr ayının 3-də Lerik rayon hərbi komissarlığı tərəfindən həqiqi hərbi xidmətə çağırılıb və Tərtər rayonunun Cəmilli kəndində yerləşən "N" saylı hərbi hissədə doğma Azərbaycanın keşiyində durub. 27 sentyabrda başlayan II Qarabağ müharibəsinin fəal iştirakçısı olub. Ağdərə, Tərtər və Suqovuşan istiqamətində gedən haqq savaşımızda böyük şücaət və qəhrəmanlıq göstərib. 10 oktyabr 2020-ci il tarixində canından artıq sevdiyi Vətənin ərazi bütövlüyü uğrunda gedən şiddətli döyüşlərdə əbədiyyət adlı dünyasına qovuşur.
Azərbaycan Respublikası Silahlı Qüvvələrinin hərbi qulluqçularının təltif olunması haqqında Prezident İlham Əliyevin imzaladığı Sərəncamlara əsasən Çingiz Babayev ölümündən sonra "İgidliyə görə", "Vətən uğrunda" və digər medallar ilə təltif edilib. Bəli, torpaq Çingiz kimi oğulların çiynində Vətən olur.
Zəfər ORUCOĞLU
Azərbaycan Jurnalistlər Birliyini üzvü
