Atanın qızına maşın almasında qeyri-adi heç nə yoxdur. İndiki zamanda oxuyan, işləyən qızın, qadının isti havalarda və ya yağışın, qarın altında boyunlarını büküb ictimai nəqliyyatı xeyli gözləməsindən, bəzi kobud, ləyaqətsiz adamların baxışları, pis hərəkətləri ilə üz-üzə gəlməsindənsə, universitetlərə, iş yerlərinə şəxsi maşınları ilə getmələri daha yaxşıdır.
Qeri-adi olan maşın alıb, nümayişkaranə şəkildə universitetin qarşısına gətirib, üstündə də "tələbə qzım" yazıb, gülünc vəziyyətə düşməkdir! Axı, universitetdə oxuyan tələbələrin içərisində yol pulunu da borc edən, pulu olmadığından günorta yeməyini yeməyən tələbələr var! İnsanların çoxu universitet bitirib, bir işə düzəlib, əli çörəyə çatana kimi bir velosiped belə ala bilmir! Ümumiyyətlə, bizim bəzi adamlarda evini, villasını, maşınını, varını-dövlətini ona-buna göstərməkdə məqsədləri nədir? Bilirsiniz, belə adamlara "görməmişlər" deyirlər və həmin "görməmişlər" anlamırlar ki, ətrafdakı insanların, onu tanıyanların gözündən düşürlər!
Maşının üstünə "tələbə qızım" yazan ata heç fikirləşirmi ki, təhsil müəssisəsinə qəbul olunmaq böyük hadisə deyil! Hər il onun qızı kimi minlərlə gənc universitetlərə qəbul olunur. O fikirləşirmi ki, gələcəkdə ali təhsil alan qızını bir işə düzəltmək üçün həmin maşını da satsa, mümkün olmayacaq? O qədər ali təhsilli adamlar var ki, işsiz-gücsüz qalıblar! Nə ilə lovğalarsınız?
Dünyanın hər yerində kimsə ailə üzvlərinə çox qiymətli hədiyyələr verirlər. Amma baxır nə zaman, harada verirlər. Pa atonnan! Böyük hadisə baş verib, bunların övladı tələbə olub! İndi göyərti satan da, küçə alverçisi də tələbə ola bilir! Sevinirsiniz, gedin, evinizdə sevinin! Kimlər də sizi təbrik edirlər, qoyun, etsinlər, camaata nəyi nümayiş etdirmək istəyirsiniz?
Belə "görməmişliklər" televiziyalar vasitəsi ilə də tez-tez nümayiş etdirilir! Görünür, bəzi tamaşaçılar da onlardan "dərs" alırlar!
"Beləcə "görməmişlərin" sırası artan xətt üzrə çoxalır!
Bizə ancaq təəssüf etmək qalır...
Xeyrəddin QOCA
