Yasamal rayonunda 167№-li tam orta məktəbdə “3 F” sinfinin şagirdlərinin müəlliminin olmaması ilə bağlı məlumat yayılıb. Sosial şəbəkədə yayılan məlumatda qeyd edilir ki, Yasamal rayonu 167 nömrəli məktəbdə sentyabrın 15-də “3 f” sinfinin uşaqları məktəbə gediblər, amma onlara dərs deyəcək müəllim olmayıb.
Valideynlər şikayət ediblər, direktor deyib ki, müəllimə sertifikasiya imtahanı vermədiyi üçün işdən çıxarılıb, başqa müəllim də yoxdu, gedin nə istəyirsiniz edin: “İndi uşaqlar müəllimsiz qalıblar, ona görə də valideynlər uşaqlarını məktəbə getməyə qoymurlar".
Məsələ ilə bağlı Bakı Şəhəri üzrə Təhsil İdarəsindən bildirildi ki, Bakı şəhəri 167 nömrəli tam orta məktəbin 3 F sinfinə müəllim təyin olunub.
“Bu müəllimləri əvəzləyəcək kadrlar var, çünki hər il sertifikasiyadan keçən, müvafiq balı toplayan və müsabiqə şərtlərini ödəyən müəllimlər vakansiya olmadığı üçün…”
Təhsil eksperti Nizami Hüseynov qeyd etdi ki, Azərbaycan müəlliminin peşəkarlığı bugünkü tələblərə cavab vermir: “Minimum biliklərə sahib olmayan şəxslərə övladlarımızın gələcəyini həvalə edə bilmərik. Məlumdur ki, təkrar sertifikasiya imtahanında iştirak edib suallara cavab verə bilməyən çoxlu sayda müəllimin fəaliyyətinə xitam verilib. Artıq yeni tədris ilindən etibarən həmin müəllimlər işdən azad olunub. Dərs ili yeni başladığı üçün, ola bilsin ki, bəzi məktəblərdə fəaliyyətinə xitam verilən müəllimin yerinə təyinat olmayıb. Qısa müddət ərzində bu məsələ öz həllini tapar. Məktəbdə onu əvəz edəcək, həmin müəllimin yerinə təyin olunacaq başqa kadr yoxdursa o zaman məktəb rəhbərliyi bununla bağlı nazirliyə müraciət edə bilər. Nəzərə almaq lazımdır ki, bu müəllimləri əvəzləyəcək kadrlar var. Çünki hər il sertifikasiyadan keçən, müvafiq balı toplayan və müsabiqə şərtlərini ödəyən müəllimlər vakansiya olmadığı üçün vəzifələrini icra edə bilmirlər. Bundan əlavə, sertifikasiyadan keçə bilməyən 743 nəfər müəllimin işdən çıxarılmasını düzgün qərar hesab edirəm. Bu müəllimlər öz vəzifələrinin icrasına davam etsəydilər, savadsız, “kor” şagidlərin sayı çox olardı. 743 müəllimin hər biri audutoriyaya girdikdə minumum 25 nəfərə dərs deyir. Bu rəqəmi hesabladıqda 10 mindən çox şagird sayı deməkdir”.
Günel CƏLİLOVA
