Müharibə veteranlarının dövlət peşə təhsili müəssisələrində ödənişli əsaslarla təhsil aldıqları müddətdə təhsil haqqı dövlət büdcəsinin vəsaiti hesabına ödəniləcək. Bu, Milli Məclisin Elm və təhsil komitəsinin 19 sentyabr iclasının gündəliyinə daxil edilən “Peşə təhsili haqqında” qanuna təklif edilən dəyişiklikdə əksini tapıb.
Layihəyə əsasən, dövlət peşə təhsili müəssisələrində ödənişli əsaslarla təhsil aldıqları müddətdə təhsil haqqı dövlət büdcəsinin vəsaiti hesabına ödənilən şəxslərin kateqoriyası genişləndirilib. Belə ki, Azərbaycan Respublikasının ərazi bütövlüyü uğrunda döyüş əməliyyatlarında iştirak etdiyinə görə “Müharibə veteranı” adı almış şəxslərin də artıq dövlət peşə təhsili müəssisələrində ödənişli əsaslarla təhsil aldıqları müddətdə təhsil haqqı dövlət büdcəsinin vəsaiti hesabına ödəniləcək.
Beləliklə, peşə təhsili alan müharibə veteranları təhsil xərcindən azad olacaq? Maraqlıdır, ali təhsil alan müharibə veteranları ilə bağlı vəziyyət necədir?
“Azərbaycanın ərazi bütövlüyü uğrunda gedən döyüşlərdə veteran olanlar, yəni müharibə iştirakçısı, rəsmi olaraq müharibə veteranı vəsiqəsi olanlar da ödənişsiz ali təhsildən yararlana biləcəklər”
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, ölkənin 51 ali təhsil müəssisəsində 187 min tələbə təhsil alır. Orta ixtisas təhsil müəssisələrində isə 30 minə yaxın tələbə oxuyur: “Prezident İlham Əliyevin müvafiq sərəncamına əsasən, təhsilin müxtəlif pillələrində ödənişli təhsil alan bir sıra kateqoriyalı şəxslər var ki, onların təhsil haqqı dövlət büdcəsi vəsaiti hesabına ödənilir. Onu da deyim ki, bu siyahı genişlənir. Məlumdur ki, əvvəllər yalnız məcburi köçkün statusunda olanlar təhsil xərcindən azad idi. Sonradan Prezident İlham Əliyev siyahını genişləndirdi. Azərbaycanın ərazi bütövlüyü uğrunda gedən döyüşlərdə həlak olanların ailə üzvləri, valideynini itirmiş, valideyn himayəsindən məhrum olanların təhsil haqqı dövlət büdcəsi tərəfindən ödənilir. Ölkə başçısının son sərəncamına əsasən, müharibədə iştirak edən və veteran statusu olan şəxslərin təhsil haqqı da dövlət tərəfindən təmin olunacaq. Bu siyahıya peşə təhsili də artıq əlavə olunub”.
Həmsöhbətimiz onu da əlavə etdi ki, Azərbaycanın ərazi bütövlüyü uğrunda gedən döyüşlərdə veteran olanlar, yəni müharibə iştirakçısı, rəsmi olaraq müharibə veteranı vəsiqəsi olanlar da ödənişsiz ali təhsildən yararlana biləcəklər. Bu, Azərbaycanda ali təhsilin əlçatanlığının təmin edilməsi məqsədilə əmək bazarında ixtisaslı kadrların sayının artması, insanların təhsil üçün xarici ölkələrə getməsinin qarşısının alınması, eyni zamanda veteranlarımızın da cəmiyyətə sosial adaptasiyası, ixtisaslı mütəxəssis olaraq əmək bazarına daxil olması istiqamətində atılmış müsbət addımdır.
Ekspert hesab edir ki, Azərbaycanda sosial cəmiyyətin qurulması və təhsilli insanların sayının artması istiqamətində bu sərəncam çox müsbət addımdır.
Günel CƏLİLOVA
