Kamran Məmmədli: “Sakinlər evlərinə köçənə qədər onlara hər ay müəyyən məbləğdə vəsait kirayə pulu verilməlidir”
“Olympus Park” tikinti şirkəti ilə bağlı şikayətlər səngimək bilmir. Belə ki, bu günlərdə Bakıda bir neçə şəxs tikinti şirkətinin ofisinin önündə etiraz aksiyası keçirib. Aksiyanın keçirilməsinə səbəb “Olympus Park” şirkəti binanı 24 ay ərzində təhvil verməli olsa da, evləri 5 ildir ki, sökülən şəxslərə hələ də ev verməyib.
Sakinlər deyiblər ki, 5 ildir, şirkət rəhbəri Rafael Qarayevin üzünü görməyiblər. O, müxtəlif bəhanələrlə sakinlərlə görüşdən yayınır. Sakinlər onlara ayrılan kirayə pullarının kəsilməsinə, vaxtlı-vaxtında verilməməsinə, mülkiyyət hüquqlarının pozulmasına etiraz edirlər. Bildirilib ki, şirkət tərəfindən layihədə dəyişiklik edilib, otaqların sayında isə əksiklik var.
Məlumat üçün bildirək ki, layihə çərçivəsində Ceyhun Hacıbəyli, Təbriz, Sahib Zamanov küçələrinin kəsişdiyi ərazidə 120 ailənin evi, 20-yə yaxın qeyri-yaşayış obyekti sökülüb. Söküntü işləri 2018-ci ildən “N-Turan MMC” tərəfindən başladılıb, “Olympus Park” isə 2019-cu ildən layihəyə qoşulub.
Ancaq “Olympus Park” tikinti şirkəti isə hələ də mənzil sahiblərinin ev problemini həll etmir.
- “Tikinti şirkətlərinin qarşısına tikintinin bitmə müddəti haqqında şərt qoyulmalıdır, belə bir qayda bizdə də tətbiq olunarsa…”
Iqtisadçı Kamran Məmmədli “Bakı-Xəbər”ə açıqlamasında qeyd etdi ki, bu sahəyə nəzarət mexanizmi tətbiq edilməlidir: “Məlumat üçün bildirim ki, hər bir tikilinin həcmindən və mürəkkəbliyindən asılı olmayaraq, onun tikinti müddəti var. Tikinti şirkətlərinin qarşısına tikintinin bitmə müddəti haqqında şərt qoyulmalıdır. Belə bir qayda bizdə də tətbiq olunarsa, binalar vaxtında tikilib, vətəndaşlara təhvil verilər. Ancaq bizdə bu sahədə boşluq var. Elə tikililər var ki, 10 ildir tikilir, ancaq hələ də ortada heç nə yoxdur. Tikilinin vaxtında təhvil verilməsi ilə bağlı beynəlxalq normativlərdən istifadə olunmalıdır”.
Iqtisadçı onu da əlavə etdi ki, şirkətlə vətəndaş arasında müqavilə imzalanır. Həmin müqavilədə qeyd edilir ki, sakinlər evlərinə köçənə qədər onlara hər ay müəyyən məbləğdə vəsait kirayə pulu verilməlidir. Kirayə pulu verilmirsə sakinlər bununla məhkəməyə müraciət etməlidir. Həmçinin, müqavilədə qeyd edilən digər normativlərin pozulması ilə də bağlı məhkəməyə müraciət edilə bilər. İnsanlar öz hüquqlarını qorumalıdır.
Əli TURABOV
