İstehsal və məişət tullantılarının, yəni zibillərin yığılması, daşınması və məhv edilməsi böyük bir problemə çevrilib. İdarə olunmayan – məhvi mümkün olmayan tullantılar yeraltı və yürüstü suların çirklənməsinə, ətraf mühitin zəhərlənməsinə, ev həşəratlarının, siçovul, siçan, tarakanların artmasına səbəb olur. Bu da, öz növbəsində, yoluxucu xəstəliklərin yayılması və çoxalması deməkdir.
Bu gün bir sıra ərazilərdə, o cümlədən bölgələrdə də zibillərin daşınması sahəsində problem var. Məsələn, Paytaxtın Binəqədi rayonu, Binəqədi qəsəbəsində məişət tullantıları yığılmadığı üçün ərazidə anti-sanitar vəziyyət yaranıb. Sakinlərin sözlərinə görə, məişət tullantılarının atıldığı qutular dolduğu üçün zibillər ətrafa atılır. Onlar bildiriblər ki, ərazidən daşınmayan zibillər xəstəlik mənbəyidir və bu vəziyyətdən narahatdırlar.
Binəqədi RİH: “Problemin aradan qaldırılması istiqamətində müvafiq işlər görülür”
Məsələ ilə bağlı Binəqədi Rayon İcra Hakimiyyətindən bildirildi ki, məsələdən xəbərdardırlar: “Həmin ərazidə məlum vəziyyətin yaranmasına texnikalarda baş verən nasazlıq idi. Problemin aradan qaldırılması istiqamətində müvafiq işlər görülür”.
Elxan Əliyev: “Aidiyyəti qurumlarda məişət tullantılarının daşınmasına nəzarət edən şöbələr var, lakin…”
Sosial sahə üzrə ekspert Elxan Əliyev qeyd etdi ki, məişət tullantılarının qalaqlanması, vaxtında daşınmaması halları ilə tez-tez qarşılaşırıq: “Ümumiyyətlə, istər mərkəz ərazilərdə, istər bölgələrdə, istərsə də kənar qəsəbələrdə bu, həll edilməyən problem olaraq qalır. Bəzi ərazilərdə isə məişət tullantıları yandırılır. Belə olan halda, ətrafa qatı tüstü, zəhərli maddələr yayılır. Yerli sakinlər isə bu tüstü ilə nəfəs almaq məcburiyyətində qalırlar. Ümumiyyətlə, aidiyyəti qurumlarda məişət tullantılarının daşınmasına nəzarət edən şöbələr var. Lakin həmin şöbələr vəziyyətdən sui-istifadə edir. Nəticədə əziyyət çəkən yenə əhali olur”.
Əli TURABOV
