Füzulidə 30 ildən sonra ilk tədris ilinin zəngi çalınıb. Füzuli şəhəri Mirzə Uluqbəy adına 1 nömrəli tam orta məktəbdə yeni tədris ilinə start verilib.
Qeyd edək ki, Mirzə Uluqbəy adına Füzuli şəhər 1 saylı tam orta məktəbi, 960 şagird yerlikdir. Məktəb Özbəkistan Prezidenti Şavkat Mirziyoyev tərəfindən özbək xalqı adından hədiyyə olaraq inşa edilib. Yeni dərs ilində məktəbdə 160 şagirddən ibarət 11 sinif təşkil edilib və 15 müəllim burada tədris aparacaq.
Onu da bildirək ki, işğaldan azad olunan digər ərazilərdə də yeni tədris ilində ilk zəng çalınır. Bura Zəngilan rayonu Ağalı kənd tam orta məktəbi, Tərtər rayonu Talış kənd tam orta məktəbi, Füzuli şəhər 1 nömrəli tam orta məktəb və Laçın şəhər 2 nömrəli tam orta məktəbi aiddir.
İşğaldan azad edilən ərazilərdə məktəblərin açılması, dərsin başlaması böyük prosesin başlanğıcıdır, həm qürurverici, həm də ümid artıran hadisədir.
“Azad olunmuş torpaqlarımızda həyata keçirilən böyük quruculuq işlərinə təhsil sisteminin yetişdirdiyi vətəndaşlar öz layiqli töhfələrini verəcəklər”
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, hazırda Prezident İlham Əliyevin müxtəlif sərəncamları ilə, işğaldan azad olunan ərazilərdə təhsil infrastrukturunun qurulması üçün işlərə başlanılıb: "İşğaldan azad edilən digər bölgələrdə də təhsil müəssisələrinin tikintisi sürətlə aparılır. Düşmənin məhv etdiyi tarixi məktəb binalarını geri qaytara bilməsək də, orada müasir tələblərə tam cavab verəcək, Azərbaycan təhsilinə əhəmiyyətli töhfə vəd edən təhsil ocaqlarının tikintisi planlaşdırılır. Şagirdlərin təhsil prosesinə cəlb edilməsi, onların işğaldan azad olunan ərazilərdə standartlara uyğun ümumtəhsil məktəblərində təhsil alması üçün artıq Ağdam, Şuşa, Füzulidə bir neçə orta məktəbin tikintisinə başlanılıb. Bu hadisə, əlbəttə ki, Azərbaycan xalqı üçün qələbədən sonra yaşadığı ikinci böyük sevinc idi. Bu gün Fizulidə əsl bayram əhval-ruhiyyəsi hökm sürür. Otuz il bundan əvvəl öz ata-baba yurdundan didərgin düşmüş kənd sakinləri yenidən bu torpağa qayıdır, öz doğma nəfəsləri ilə torpağa can verirlər. İllərlə yetim qalıb, boynu bükük şəkildə əsl sakinlərini gözləyən kənd öz qollarını əzizləri üçün açır. Burada həyat yenidən canlanır”.
Birlik sədrinin sözlərinə görə, Ermənistan işğalı nəticəsində şəhər tamamilə dağıdılaraq xarabalığa çevrilmişdi. Artıq Füzuli şəhəri bərpa edilir və müasir standartlara uyğun olaraq yenidən qurulur. İşğal nəticəsində xarabalığa çevrilən məktəblərimizdə çalınacaq zənglər övladlarımızı elmin sirlərini öyrənməyə səsləyəcək: “Əminik ki, azad olunmuş torpaqlarımızda həyata keçirilən böyük quruculuq işlərinə təhsil sisteminin yetişdirdiyi vətəndaşlar öz layiqli töhfələrini verəcəklər".
Günel CƏLİLOVA
