Sərnişinlərin rahatlığı naminə respublikamızda davamlı olaraq dövlət tərəfindən nəqliyyat-yol kompleksinin daha da müasirləşməsi, dünya standartları səviyyəsinə çatdırması üçün böyük işlər görülür. Belə bir dinamik inkişaf dövründə Lənkəran əhalisinin gediş-gəlişinə əngəl törədən kənd yolları, hətta şəhərin özündə küçələr hələ də vardır. Vəziyyətlə yerli məmurlar tanış olsalar da, əməli bir iş görmək əvəzinə adamlara yalan vəd verməklə həm dövləti aldadır, həm də ölkə başçısının sərəncamı ilə yolların təmiri üçün ayrılan müəyyən maddi vəsaiti dədə malı kimi mənimsəyir. Nəticədə illərlə əl dəyməyən yollar dağılıb gedir, rayonun çox yaşayış məntəqəsində sakinlər yolsuzluq üzündən bir yerə getməkdən ötrü əziyyət çəkir.
Lənkəran-Vilvan-Osakücə-Tükəncil avtomobil yolunun təmirinə ehtiyacı yaranıb. 40 mindən artıq əhali tərəfində mütəmadi olaraq istifadə edilən yol tam yararsız haldadır. Onun bəzi hissələri deformasiyaya uğrayıb, bəziləri isə çöküb. Yağışlı havada vəziyyət tamam ağırlaşır, avtomobillərin hərəkətində ciddi problem hər addımbaşı özünü göstərir. Qeyd olunan avtomobil yolu 2012-ci ildə dövlət büdcəsindən ayrılan 4 mln manat vəsait hesabına yenidən qurulub və yolun açılışında Prezident İlham Əliyev iştirak edib. İllərdir yol sıradan çıxıb, üstündə sayı bilinməyən cala-çuxurlar əmələ gəlib. Hər gün bu marşrutdan istifadə edən adamlar aylardır ki, sıradan çıxıb, korlanmış kələ-kötür yola asfalt döşəyib, onu lazımı səviyyə gətirməyi səbirlə gözləyir.
Rayonun Digah kənd sakinlərin də yol sıradan bəxti heç gətirmir. Yollar o qədər bərbaddır ki, burada gediş-gəliş min bir əziyyətlə başa gəlir. Hətta yola çıxan sağ-salamat mənzil başına çatmasına inanmır. Yağışlı, qarlı günlər daha təhlükəli olur. Bir neçə dəqiqə yağışın yağması kifayət edir ki, kəndin yollarında gölməçələr əmələ gəlsin.
Digahlılar bildirirlər ki, Digah rayonun böyük kəndi olsa da, burada yol və qaz problemi illərdir ki, öz həllini tapmır. Səlahiyyətli şəxslər etdiyimiz şikayətləri qulaqardına vururlar. Çünki onların yeri çox rahatdır, sadə camaatın dərdinə qalmağı özlərinə ar bilirlər. Məhz bu səbəbdən digahlıların günü qaradır. Qeyd olunan sosial məsələlər qışın soyuğunda isə kəndi iflic edir.
Lənkəran şəhərinin mərkəzinə gəldikdə isə burada Zərifə Əliyeva və Nizami küçələrinin arasında yerləşən yol baxımsız vəziyyətdədir. Belə ki, əksər hissəsinin asfaltı dağılmış, yolda çala-çuxurlar əmələ gəlib. Bu da sürücülərə narahatlıq yaradır. Həmçinin hava bir balaca yağışlı olanda çuxurlar su ilə dolur və yoldan keçən piyadaların gediş-gəlişi çətinləşir.
Bəli, cənub mirvarisi kimi adı dillərə düşən Lənkəranın yol mədəniyyətində son illərdə yaranan belə axsamalar sakinləri narazı salır. Yerli məmurların sadəcə görmək istəmədiyi işin həllindən ötrü lənkəranlılar ən çox inandıqları, həmişə onunla bir olmaq arzusunda olan, ölkədə gördüyü işlərə ürəkdən sevinən və bütün Azərbaycan xalqının əziz oğlu Prezident İlham Əliyevdən indi kömək istəyirlər.
Zəfər ORUCOĞLU, Azərbaycan Jurnalistlər Birliyinin üzvü
