Bildiyimiz kimi, son iki ildir ki, dövlət uşaq bağçalarına qəbul “Məktəbəqədər təhsil müəssisələrinə elektron sənəd qəbulu sistemi” vasitəsilə həyata keçirilir. Elektron qeydiyyat məsələsi həyata keçirildikdən sonra valideynlərin yeni şikayətləri meydana çıxdı. Bu şikayətlər bu il daha da artıb.
Belə ki, bir qisim valideynlər iddia etdilər ki, qeydiyyatdan keçə bilmirlər, bəziləri isə “qeydiyyatdan keçmişik, amma bağçada yer yoxdur”, “qeydiyyatdan keçsək də müraciətimiz qeydə alınmayıb, təkrar keçmək tələb olunur, amma sistem bağlıdır” kimi fikirlər deyənlər də var. Elə valideynlər də var ki, bağçada boş yerin olduğunu, lakin sistem bağlı olduğu üçün uşağını bağçaya qəbul edirə bilmədiyini deyir. Rus bölməsinə uşağını sistem açılan gün qeydiyyatdan keçirən, bildiriş alan valideyn də var ki, hələ də övladını bağçaya yerləşdirə bilməyib. Bu kimi hallar ətrafımızda çoxdur. Beləliklə, uşaq bağçalarına qəbul elektron qaydada olandan sonra çoxlu sayda uşaq kənarda qalıb, onların valideynləri sistemin yenidən açılmasını gözləyirlər. Övladlarını qeydiyyatdan keçirsələr də hələ bağçalarda yerləşdirə bilməyən valideynlər hesab edir ki, qarşılaşdıqları problemi bağça müdirləri özü yaradıb və bu bürokratik əngəldir, məqsəd isə məlumdur.
Bəzi valideynlərin sözlərinə görə, uşaq bağçalarının icra hakimiyyətlərinin tabeçiliyindən çıxarılıb Elm və Təhsil Nazirliyinin balansına verilməsi onlarda ümid yaratmışdı ki, bağça müdirləri daha bürokrat əngəllər törədib rüşvət tələb etməyəcək, amma deysən, yenə də köhnə hamam, köhnə tasdır.
Məktəbəqədər təhsildə korrupsiya və rüşvət hallarının qarşısının alınması, şəffaflığın təmin edilməsi məqsədilə elektron qəbul həyata keçirilsə də, bir çox valideynlər şikayətçidir.
Valideynlər “Məktəbəqədər təhsil müəssisələrinə elektron sənəd qəbulu sistemi”nin nə zaman açılacağını səbrsizliklə gözləyir.
Cəsarət Valehov: “Sistem yəqin ki, ayın 15-dən sonra açıla bilər”
Məsələ ilə bağlı Elm və Təhsil Nazirliyinin İctimaiyyətlə əlaqələr sektorunun müdiri Cəsarət Valehov bizimlə söhbətində bildirdi ki, böyük ehtimalla sistem sentyabrın 15-dən sonra açılacaq: “Sistem yəqin ki, ayın 15-dən sonra açıla bilər”.
O, həmçinin vurğuladı ki, məktəbəqədər təhsil müəssisəsinə qəbul elektron qayada aparılır və hansısa müdaxilədən söhbət gedə bilməz.
Elçin Əfəndi: “Bağçaların sayının azlığı təbii ki, bütün uşaqların qeydiyyatdan keçməsinə imkan vermir”
Təhsil eksperti Elçin Əfəndi “Bakı-Xəbər”ə şərhində “Artıq iki ildir ki, uşaq bağçalarına qeydiyyat məsələsi Elm və Təhsil Nazirliyi tərəfindən elektron qaydada həyata keçirilir. Bu da bir növ obyektivliyin təmin edilməsi məqsədilə yaradılan funksiyadır. Buna qədər birinci sinifə və məktəbə hazırlıq qrupuna qəbul bu qaydada keçirilib. Sadəcə olaraq valideynlərin əksəriyyəti prosesi idarə edə bilmirlər, onlar hələ də köhnə qaydalarla hərəkət edir, bağçaya yaxınlaşıb müəyyən ödəniş müqabilində qeydiyyata aldırırlar. Onlar daha operativ olan elektron qəbul sistemindən istifadə etmirlər”-deyə qeyd etdi.
E.Əfəndi bildirdi ki, bağçalara elektron qaydada qəbul üçün ASAN Xidmət Mərkəzlərində də şərait yaradılıb, valideynlər övladlarını orada da qeydiyyatdan keçirə bilərdilər. “1900-ə yaxın başça var. Bura həm özəl, həm də dövlət bağçaları aiddir. Uşaq sayı ilə müqayisədə bağçaların sayı azlıq təşkil edir. Nəzərə alsaq ki, müxtəlif yaş kateqoriyalarına uyğun uşaqlar qeydiyyata alınır və əlbəttə, bu say ən azı 300 minin üzərində olmalıdır. Nəticə etibarı ilə bağçaların sayının azlığı təbii ki, bütün uşaqların qeydiyyatdan keçməsinə imkan vermir. Yaxud yaxın ərazilərdə bağçalar dolur və yer olmur. Bunun üçün qarşıdakı illərdə dövlət bağçalarının sayının artırılması arzuediləndir. Eyni zamanda sahibkarlıq fəaliyyəti olduğu üçün özəl bağçaların da fəaliyyətinə icazə verilməlidir. Nəticədə də gələcəkdə elektron sistem vasitəsi ilə bağçalarla, qeydiyyata düşməklə bağlı problemin aradan qalxmasına nail olmaq olar”-deyə ekspert qeyd etdi.
Eskpert həmçinin bildirdi ki, hazırda sistem komplektləşdirilməsi ilə bağlı dayanma var: “Elektron qəbul sistemi 1-15 sentyabr tarixlərində qrupların komplektləşdirilməsi səbəbindən müvəqqəti dayandırılıb. Komplektləşdirmə prosesi bitdikdən sonra uşaqların məktəbəqədər təhsil müəssisələrində boş yerlərə qəbulu ilboyu davam edəcək. Yəni, komplektləşdirmə başa çatandan sonra kimlər qeydiyyatdan keçə bilməyibsə, yenidən keçə biləcəklər”.
İradə SARIYEVA
