Məlum olduğu kimi, təkrar sertifikatlaşdırmadan keçməyən 743 müəllimin əmək müqaviləsinə xitam verilib. Həmin müəllimlərin əmək müqaviləsinə xitam verilməsi ictimaiyyət tərəfindən xoş qarşılanır.
Məlum qərarla bağlı Elm və təhsil naziri Emin Əmrullayev də keçirdiyi brifinqdə bəyan etdi ki, təhsildə güzəşt etmək, vətənə xəyanət etmək deməkdir. Lakin "vətənə xəyanət" açıqlamsından bir bir neçə gün sonra nazirin bir fikri yenidən ajotaj yaratdı. Bu dəfə isə Əmrullayev dedi ki, əmək müqaviləsinə xitam verilən müəllimlərin işinə yenidən baxılacaq. Nazirin bir-birini təkzib edən bu açıqlamaları narazılığa səbəb olub.
Maraqlıdır, imtahanda iştirak edən müəllimlər minimum tələblərə cavab verə bilməyiblərsə, onlara güzəşt edilməlidirmi?
Vüqar Bayramov: “Təkrar sertifikatlaşdırmadan keçməyən və əmək müqaviləsinə xitam verilən həssas qrupa aid şəxslərin işlə təminatında bəzi detallar nəzərə alınmalıdır”
Millət vəkili Vüqar Bayramov “Bakı-Xəbər”ə açıqlamasında qeyd etdi ki, təhsil sahəsində aparılan islahatlara uyğun olaraq nazirlik tərəfindən əməyin keyfiyyət meyarları əsasında qiymətləndirilməsi təqdirəlayiqdir: “Təkrar sertifikatlaşdırmadan keçməyən və əmək müqaviləsinə xitam verilən həssas qrupa aid şəxslərin işlə təminatında bəzi detallar nəzərə alınmalıdır. Yaxşı olar ki, sertifikasiya nəticələrinin sosial risk təhlili aparılsın. Yəni, sertifikasiyadan keçməyənlərin ailələrində sosial vəziyyətin xüsusi qiymətləndirilməsinə ehtiyac var. Bir sıra ailələrdə sertifikasiyadan keçməyən müəllim ailəyə yeganə gəlir gətirən şəxsdir. Bu baxımdan, risk təhlili nəticələrinə uyğun olaraq yalnız həssas qrupların deyil, eyni zamanda sosial baxımdan təminata ehtiyacı olanların da məktəbdaxili texniki vəzifələrdə çalışmalarına imkan yaradılması məqsədəuyğundur".
Kamran Əsədov: “743 nəfərin hər biri gələn il müəllim olaraq işə qayıda bilər, onlar gedib bir il də yaxşı hazırlaşacaqlar və...”
Təhsil eksperti Kamran Əsədovun sözlərinə görə, nazir onların ilk olaraq müəllim fəaliyyətini, daha sonra insan olaraq fəaliyyətini nəzərdə tutub: "Sertifikasiya imtahanı çox vacibdir. Onu da nəzərə almaq lazımdır ki, 743 müəllim bu illər ərzində heç də yalnız ibtidai sinifdən dərslər keçməyib, eyni zamanda qeyri-ixtisas fənnlərdən də dərs deyiblər. Onların təhsilləri, əmək müqavilələri ibtidai sinif müəllimliyi olsa da, bunlar yığma fənlərdən dərs deyib. Ona görə də biz sertifikasiyada bu amili nəzərə almalıyıq. Maraqlıdır, niyə indiyə qədər hörmətli nazir 743 müəllimin hansı universitetdən məzun olduğunu açıqlamır və demir ki, əziz universitet, axı sən bu məzunu buraxmısan, sən diplom vermisən buna? Təbii ki, həmin şəxslər insandırlar, bu və ya digər təhsilləri var, yəni ya ali təhsil, ya orta ixtisas təhsili, fərqi yoxdur. Onlar öz ixtisas dərəcələrinə uyğun məktəbdə kitabxanaçı katibə, laborant bu tipli vəzifələrdə işləyəcəklər. Bəli, onların pedaqoji fəaliyyətinə indi qadağan qoyulur. Amma həmin müəllimlər MİQ imtahanında iştirak edib, yenidən prosesə qayıda bilərlər. Bəs onda necə olacaq? Onlar, gedib hazırlaşıb gələn il sıfırdan müəllim kimi işə qəbul edilə bilərlər. Yəni biz prosesin sonunu proqnozlaşdırmamışıq. 743 nəfərin hər biri gələn il müəllim olaraq işə qayıda bilər. Onlar gedib bir il də yaxşı hazırlaşacaqlar və gəlib MİQ imthanaı verib, işə gedəcəklər. Yəni birmənalı şəkildə fəaliyyət planı yoxdur".
Günel CƏLİLOVA
