Məlum olduğu kimi, bu ildən "İnnovativ məktəb" layihəsi çərçivəsində bir neçə təhsil müəssisəsində sahibkarlıq fənni pilot şəkildə tədris ediləcək. Bu məqsədlə İsrailin ən böyük məktəb şəbəkəsi “ORT İsrail” tərəfindən müvafiq dərs vəsaiti hazırlanıb. Bu barədə Elm və Təhsil Nazirliyinin rəsmi internet səhifəsində yerləşdirilmiş məlumatında xəbər verilib.
Qeyd edilib ki, sözügedən vəsait şagirdləri gələcəyin çağırışlarına hazırlayacaq sahibkarlıq təfəkkürü, yaradıcı düşüncə və XXI əsr bacarıqlarının aşılanması kimi mövzuları əhatə edir. Vəsaitə, həmçinin, layihəəsaslı tapşırıqlar, komanda işləri və individual çalışmalar daxildir. Sahibkarlıq fənninin tədrisi ilə bağlı cari ilin 4-8 sentyabr tarixlərində pilot tədris aparılacaq məktəblərin direktor və müəllim heyəti üçün “ORT İsrail” mütəxəssisləri tərəfindən təlim keçirilib. Təlimdə layihəəsaslı tədris, müəllimlərin şagirdlərə yanaşması, məktəblilərin yaradıcı düşüncəyə təşviqi, sinif otağında müəllim-şagird rolları və digər mövzulara toxunulub, praktiki tapşırıqlar, interaktiv müzakirələr təşkil edilib.
Məlumdur ki, bu gün şagirdlərin dərs yükü normadan artıqdır. Belə bir ərəfədə “sahibkarlıq dərsi”nin tədris edilməsi nə dərəcədə düzgündür? Maraqlıdır, məktəblilər bu yükü qaldıra biləcəkmi?
Elçin Əfəndi: “Hazırki dövrdə şagirdlərin dərs yükü ağırdır, sahibkarlıq kursu da əsas fənlərdən ayrı, fakültativ məşğələ formasında keçirməlidir”
Təhsil eksperti Elçin Əfəndi hesab edir ki, sahibkarlıq fənninin keçirilməsində məqsəd sahibkarlıq haqqında məlumatın verilməsidir: “Sahibkarlıq kursunun tədris olunmasında məqsəd məncə budur ki, aşağı, orta yaş qrupuna aid şagirdlər sahibkarlıq, sahibkarlıq fəaliyyəti nədir, bilsinlər, bu barədə məlumatlı olsunlar. Şagird bilsin ki, sahibkar olarsa gəlirləri nə qədər olacaq. Uşaqlarda sahibkarlığa maraq yaransın”.
Ekspert onu da əlavə etdi ki, hazırki dövrdə şagirdlərin dərs yükü ağırdır. Fakültativ məşğələlər də var. Sahibkarlıq kursu da əsas fənlərdən ayrı, fakültativ məşğələ formasında keçirməlidir. Bu, pilot layihədir və kütləvi hal almamalıdır.
Kamran Məmmədli: “Orta məktəblərdə maliyyə savadlılığının elementləri tədris olunmalıdır”
İqtisadçı Kamran Məmmədli “Bakı-Xəbər”ə açıqlamasında isə bildirdi ki, orta məktəblərdə maliyyə savadlılığının elementləri tədris olunmalıdır: “İnsanların bir çoxu məktəb, universitet bitirəndən sonra belə həyatda rastlaşdıqları müasir çağırışların öhdəsindən gələ bilmirlər. Halbuki, məsələn, məktəb bitirib işə başlayan hər bir insandan artıq ilkin maliyyə savadlılığı, öz gəlir və xərclərini planlaşdırmaq, vergidən yayınmamaq, kiçik də olsa investisiya etmək, banklar ilə münasibətə girmək və s kimi müasir vərdişlər tələb olunur.Bu səbəbdən də orta məktəb şagirdlərinə artıq ilkin maliyyə savadı verməlidir.
Riyazi məsələləri bir hissəsi malların qiymətlərinin, alışların dəyərinin və vergilərin hesablanmasına həsr edilməlidir. İnsanlar arasında maliyyə savadlılığının artması onların öz həyatlarını daha doğru planlaşdırmasına, maliyyə risklərindən uzaq durmalarına və ümumilikdə ölkədə maliyyə dayanıqlılığının güclənməsində səbəb ola bilər”.
Günel CƏLİLOVA
