2023/2024-cü tədris ili üzrə rus bölməsi üzrə birinci sinfə 11 943, məktəbəhazırlıq qruplarına 5 568 uşaq qəbul olub.
Ötən 2022/2023-cü il tədris ilinin əvvəlində isə rus bölməsinə birinci sinfə 14 989, məktəbəhazırlıq qruplarına 6 168 uşaq qəbul olunub. Rus bölməsinə hər il olduğu kimi bu ildə xeyli müraciət edənlər var. Ötən ilə nisbətən bir qədər azalma müşahidə olunur. Lakin tələbat var. Buna baxmayaraq rus bölməsi ilə bağlı hər zaman fikir ayrı-seçkiliyi var. Bunu da rus bölməsində müəllim çatışmazlığı və təhsilin zəif olması ilə əlaqələndirirlər.
Bəs görəsən, rus bölməsinə marağın azalmasının əsas səbəbi nədir?
Aytəkin Kamranqızı: “Rus bölməsinin kontingenti getdikcə azalır, yəni bu bölmədə uşaqların sayı azdır”
Sosioloq Aytəkin Kamranqızı “Bakı-Xəbər”ə açıqlamasında qeyd etdi ki, rus bölməsinin kontingenti getdikcə azalır, yəni bu bölmədə uşaqların sayı azdır. Demək olar ki, hər bir məktəbdə bu bölmədə bir sinif var. Hər sinifdən, yəni 1-dən 11-ci sinifə qədər hərəsindən bir sinif var, hələ ki, fəaliyyətdədir: “Rus dilinə marağın azalmasının əsas səbəblərindən biri şagirdlərin və valideynlərin ingilis dilinə daha çox önəm verməsidir. Qəbul imtahanlarında ingilis dilinin xarici dil kimi götürülməsi də bu dilə şagirdlərin marağını artırır. Buna görə də məktəblərin əksəriyyətində ingilis dili 1-ci sinifdən 11-ci sinifə qədər tədris olunur. Əsas ingilis dili götürülür. Burada valideynlərin də fikri böyük rol oynayır, narahatlıq keçirirlər ki, birdən qəbul imtahanında nə isə dəyişə bilər. Birdən rus dilini götürərlər, ingilis dili qalar. Yəni əsas xarici dili kimi, hələ ki, ingilis dilini götürürlər”.
Kamilə Əliyeva: “Rus bölməsində təhsil almaq istəyən uşaqlar əvvəlcədən müsahibədən keçirlər, dil anlayışı olmayan uşaq…”
Milli Məclisin Elm və təhsil komitəsinin üzvü Kamilə Əliyevanın sözlərinə görə, rus bölməsində təhsil almaq istəyən uşaqlar əvvəlcədən müsahibədən keçirlər: “Rus bölməsinə daxil olan uşaqlar üçün əvvəlcədən müsahibə var. Əgər uşaq həqiqətən rus dilində sərbəst danışırsa, düşüncələrini və fikirlərini rus dilində izah edə bilirsə, o zaman rus bölməsinə sənəd verə bilərlər. Tamamilə rus dilində danışa bilməyənləri qəbul etmirlər. Komissiya tərəfindən uşağın dil biliyi araşdırılır. Bu hal çox gözəldir. Valideynin dil biliyinin olmamasının uşaqlar üçün gələcəkdə çətinlik yaradır. Çox vaxt ailədə nə valideyn, nə də uşaq rus dilində danışa bilmir. Gələcəkdə çətinlik yaranır. Evdə də valideyn bilmədiyi üçün övladı ilə məşğul ola bilmir. İndi ölkədə ingilisdilli və fransızdilli məktəblər fəaliyyət göstərir. Valideynlər uşaqlarını həmin məktəblərə göndərirlər. Yəni təkcə tələbat rus bölməsinə deyil. Ümumiyyətlə, uşaq yaşlarında dili daha tez öyrənmək olur. Hər bir insan da nə qədər çox dil bilsə, o qədər dünyagörüşünə təsiri olacaq. 21-ci əsrdə yaşayırıq. Bununla dünya arenasına daha yaxşı çıxış əldə edə bilərik. Uşaqlar üçün dil biliyinin olması müsbət haldır”.
Günel CƏLİLOVA
