Elm və təhsil naziri Emin Əmrullayev paytaxtdakı təhsil işçilərinin sentyabr konfransında iştirak edib. Konfransda iştirak edən nazit çıxışı zamanı təhsil sistemində yaşanan bəzi problemlər haqqında fikir bildirib.
Nazir çıxışı zamanı təhsil sisteminin sanki tərs qurulduğunu dilə gətirib: “Qabaqcıl ölkələrdə erkən yaşdakı uşaqlara tədris verənlər ən yüksək təhsil biliyinə malik olan şəxslərdir. Bizdə isə bağçalarda təhsilverənlərin, demək olar ki, yarısı bu sahədə təhsili olmayanlardır. Hansı rayonda ibtidai sinif müəllimlərinin bilik səviyyəsi ilə bağlı problem varsa, orada uşaqların da bilik səviyyəsi aşağıdır".
Məlumdur ki, məktəbəqədər təhsil uşaqların təlim-tərbiyəsinin təməlidir.
Qeyri-ixtisas müəllimlərinin bağça müəllimi kimi fəaliyyət göstərməyi nə dərəcədə doğrudur? Bu problemin aradan qalxması üçün hansı işlər görülməlidir?
Nizami Hüseynov: “Bağçalarda işləyən müəllimlərin bir çoxunun ixtisası tamamilə fərqlidir, hətta bəlkə də, heç pedaqoji sahədə deyil”
Təhsil eksperti Nizami Hüseynov “Bakı-Xəbər”ə açıqlamasnda qeyd etdi ki, bağçalarımızda kifayət qədər ciddi problemlər var: “Bu problemlərin əsasında da müəllimlərin ixtisası üzrə işləməməsi durur. Diqqət etsək görərik ki, bağçalarda işləyən müəllimlərin bir çoxunun ixtisası tamamilə fərqlidir, hətta bəlkə də, heç pedaqoji sahədə deyil. Xarici təcrübəyə nəzər yetirəndə görürük ki, uşaq bağçalarında işləyən müəllimlərin ixtisası, demək olar ki, məhz bu sahədədir. Mütləq şəkildə müəllimləri işə götürərkən onların psixoloji durumlarına da diqqət yetirirlər. Bu psixoloji yoxlamanı da kağız və ya test üzərində etmirlər. Mütləq şəkildə praktiki olaraq yoxlayırlar. Daha sonra müəllim testdən keçsə belə, əgər psixoloji durumu istədikləri səviyyədə deyilsə, o zaman uşaq bağçasında işləməyinə icazə vermirlər. Düşünürəm ki, bizdə də eyni vəziyyət olmalıdır. İstər hazırda işləyən, istər gələcəkdə uşaq bağçalarında işləyəcək müəllimlərin mütləq şəkildə sertifikasiyada və yaxud da qəbulda psixoloji durumları ölçülməlidir”.
Elçin Əfəndi: “Müvafiq ixtisası olan müəllim gəlib bağça müəlliməsi olaraq çalışır, əvvəlki dövrlərin ən bərbad problemi məhz bundan ibarətdir”
Təhsil eksperti Elçin Əfəndi bizimlə söhbətində bildirdi ki, ibtidai təhsil pilləsi ən strateji təhsil pilləsidir. Burda bizim yetişdirdiyimiz şagirdlər nə qədər şəxsiyyət yönümlü yetişərlərsə, biz bir o qədər növbəti təhsil pillələrində tədris prosesi ilə bağlı çətinliklə üzləşməyəcəyik: “Bu sahədə yaşanan ən böyük problemlərdən biri bağçalarda bu sahənin təhsilini almayan şəxslərin dərs tədris etməsidir. Danılmaz faktdır ki, vaxtilə yoldan keçəni belə tutub gətirib məktəb bağçalarda dərsə cəlb ediblər. Müvafiq ixtisası olan müəllim gəlib bağça müəlliməsi olaraq çalışır. Əvvəlki dövrlərin ən bərbad problemi məhz bundan ibarətdir. Ümumiyyətlə, saxta diplomu olanlar da var. Hazırda 607 100 nəfər şəxs var ki, onların diplomu tanınmır. Həmin şəxslərin oxuduğu universitet mövcud deyil, əlində diplom yoxdur, araşdırıb tapmaq da olmur. Yəni belə olduğu halda, əlbəttə ki, biz təhsilin ən strateji pillələrindən başlamalıyıq ki, burada konkret olaraq müvafiq ixtisas sahiblərini və peşəkar ixtisas sahiblərini prosesə cəlb edək. Belə etsək, təhsilin növbəti pillələrində çətinliklə üzləşmərik. Məlumdur ki, məktəbəqədər təhsil pilləsi bura qədər icra hakimiyyətlərinin tabeliyində idi. Dövlət başçısının sərəncamı əsasında bağçalar 2021-ci ildən Elm və Təhsil Nazirliyinin ixtiyarına verildi. Elm və Təhsil Nazirliyi bu istiqamətdə də işlər görür. Bu istiqamət inkişaf etdirildikdən sonra bura qəbul olunan bağça müdirləri, müəllimlər müvafiq qanunvericiliyin tələbinə uyğun yalnız məktəbəqədər təlim-tərbiyə ixtisası üzrə istər orta ixtisas təhsil müəssisəsini və yaxud ali təhsil müəssisəsini bitirmiş şəxslər olmalıdır".
Ekspert hesab edir ki, məktəbəqədər təhsil sahəsində çalışanlarda da sertifikasiyadan keçməlidir. Belə olarsa biz daha çox bilikli şəxsləri prosesə cəlb edə bilərik.
Günel CƏLİLOVA
