"Bəzi məktəblərin rus bölməsində təhsil alan yuxarı sinif şagirdləri arasında Azərbaycan dili bilikləri yetərli deyil". Bunu elm və təhsil naziri Emin Əmrullayev keçirdiyi brifinqdə deyib. Nazir qeyd edib ki, məsələ ilə əlaqəli məktəblərdə monitorinqlərin aparılması nəzərdə tutulur: "Ölkədə Azərbaycan dili rəsmi dövlət dilidir və bunu hamı bilməlidir. Bu il nəzarət tədbirləri daha da artacaq və məktəb rəhbərlərinə təlimatlar da veriləcək".
Aparılan araşdırmalar zamanı məlum olub ki, rus bölməsində oxuyan uşaqlar Azərbaycan dilini zəif bilirlər.
“Azərbaycanda olan rusdilli məktəblərin şagirdləri təhsillərini başa vurduqdan sonra rəsmi Azərbaycan dilini mükəmməl səviyyədə bilmir”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, rus bölməsində oxuyan şagirdlər də Azərbaycan dilini mükəmməl bilməlidirlər. Azərbaycanlı uşaqların xarici dili bilib öz dilimizi bilməməsi heç bir məntiqə sığan deyil. Bu prosesi tənzimləmək üçün tədrisimizin əsas vəzifəsi rus sektorunda "Azərbaycan dili”nin, Azərbaycan bölməsində isə "Rus dili”nin tədrisini gücləndirməkdir. Yalnız bu yolla biz dil baryerlərini aradan qaldıra bilərik”.
N.Hüseynovun sözlərinə görə, hazırda rus bölməsində Azərbaycan dilinə ayrılan saat iki saatdır. Bu isə çox aşağıdır. Məlum məsələ ilə bağlı aparılacaq monitorinqlər təkcə yuxarı siniflərdə yox, aşağı siniflərdə də aparılmalıdır: “Rus dilli məktəblərdə azərbaycan dilinin lazımi səviyyədə tədris olunmaması imtahan nəticələrinə də təsir göstərir. Belə ki, rus dilli abituriyentlərin əksəriyyəti digər fənnlərdən yüksək bal toplasa da, Azərbaycan dilindən keçid balı toplaya bilmir. Bu isə onu göstərir ki, illər ərzində, xüsusən tədris fərqli dillərdə aparılan məktəblərdə Azərbaycan dili aşağı səviyyədə tədris olunub”.
Ekspertin sözlərinə görə, Azərbaycanda olan rusdilli məktəblərin şagirdləri təhsillərini başa vurduqdan sonra rəsmi Azərbaycan dilini mükəmməl səviyyədə bilmir. Müasir Azərbaycan gəncliyi tarixini, ana dilini yaxşı bilməli vətənpərvər ruhda böyüməlidir: “Rus bölməsində təhsil alan şagirdlər, adətən, öz dilimizdə danışmağı bacarmır və ən ağrılısı isə, bu dildə danışmağı ar bilir bəzən. Əlbəttə ki, burda birinci günahkar ailədirsə, ikinci günahkar valideyndir. Ən azından evdəki danışığı daima ana dilində aparmalıdır”.
Günel CƏLİLOVA
