“Hansı ali təhsil müəssisisəsi müəllim hazırlaya bilmirsə, həmin müəssisədə bu ixtisasın tədrisi dayandırlacaq”. Bunu elm və təhsil naziri Emin Əmrullayev yeni tədris ili bağlı media üçün keçirilən brifinqdə deyib.
"Hansısa ali təhsil müəssisələrinin məzunları bu gün bizim imtahanlarımızda minimum balı toplaya bilmirlərsə, həmin müəssisələrin rəhbərinə bu haqda suallar verilir. Bu, davamlı hal alarsa, həmin müəssisədə müəllimlik ixtisasının tədrisi dayandırılacaq".
Təhsil nazirinin məlum fikri ekspertlər tərəfindən dəstəklənir.
Vüsalə Ağabəyli: “Ali təhsil müəssisələrinin məqsədi əmək bazarına kadr hazırlamaqdır, əgər ixtisasına uyğun kadr hazırlaya bilməyəcəksə…”
Təhsil eksperti, filologiya üzrə fəlsəfə doktoru, dosent Vüsalə Ağabəyli “Bakı-Xəbər”ə açıqlamasında qeyd etdi ki, bu doğru qərardır, illərlə müəllim kimi işləyib öz ixtisasından xəbərsiz olan şəxslər özlərini başqa sahələrdə sınamalıdır: “Uzun müddət idi ki, bu məsələni biz gündəmə gətirirdik, illər sonra müəllimlər attestasiya olunursa, ilkin mərhələdə onların diplomu necə aldıqları sorğulanmalıdır. Axı, bu diplomları da Elm və Təhsil Nazirliyi təsdiq edir. Ali təhsil müəssisələrinin məqsədi əmək bazarına kadr hazırlamaqdır. Əgər ixtisasına uyğun kadr hazırlaya bilməyəcəksə, o zaman həmin ixtisasın cəmiyyətə də faydası yoxdur. Bu halda ən doğru qərar həmin müəssisələrdəki müvafiq istiqamət üzrə müəllimlik ixtisasının dayandırılmasıdır”.
Kamran Əsədov: “Təhsildə inkişaf, uğur istəyiriksa ali təhsil müəssisələrində geniş, əhatəli islahatlar həyata keçirilməlidir”
Təhsil eksperti Kamran Əsədov “Bakı-Xəbər”ə açıqlamasında bildirdi ki, hazırda 51 ali təhsil müəssisəsinin 25-də pedaqoji kadr hazırlığı həyata keçirilir: “Etiraf etmək lazımdır ki, son illər müəllimlərin işə qəbulu və pedaqoqların bilik, təcrübəsinin yoxlanılması ilə bağlı keçirilən imtahanlar bəzi məqamları üzə çıxartdı. Diaqnostik və sertifikatisiya imtahanları göstərdi ki, ali və orta ixtisas təhsil müəssisələrinin buraxdığı kadrlar əmək bazarının tələblərinə uyğun deyil. Kifayət qədər ali təhsilli, diplomlu kadrlar var ki, onların bilik və bacarıqları əmək bazarının və müasir dövrün tələblərinə cavab vermir. Həmin şəxslər öz ixtisasları üzrə minimum tələbləri belə icra edə bilmir".
Ekspert onu da əlavə etdi ki, Elm və Təhsil Nazirliyi azı 5 ildən bir həmin ali təhsil müəssisələrini akkreditasiyadan keçirir və onlara uyğunluq sertifikatı təqdim edir: "Maraqlıdır, hansı qaydalar əsasında yoxlanış keçirilir və onlara fəaliyyət icazəsi verilir. Yoxlanılma düzgün həyata keçirilsə idi bu kimi problemlər olmazdı. İmtahanda iştirak edən ibtidai sinif müəllimlərindən 740 nəfərinin bilik və bacarıqları minimum tələblərdən belə aşağı olub. Bu isə o deməkdir ki, onların təhsil aldığı müddətdə ciddi yanaşma tətbiq edilməyib. Digər fənnlər üzrə keçirilən imtahanlar da analoji hal müşahidə olunacaq. Bununda səbəbi ali və orta ixtisas təhsili ilə bağlı ciddi bir fəaliyyət yoxdur. Təhsildə inkişaf, uğur istəyiriksa ali təhsil müəssisələrində geniş, əhatəli islahatlar həyata keçirilməlidir”.
Günel CƏLİLOVA
