“Maarifçi Qadınlar” İctimai Birliyi 2023-cü ildə Qeyri-Hökumət Təşkilatlarına Dövlət Dəstəyi Agentliyinin elan etdiyi müsabiqənin qalibi olub.
10 ilə yaxındır ki, bu Birlik təhsildən kənarda qalan Azərbaycan vətəndaşlarının övladlarını təhsilə cəlb etmək kimi müqəddəs bir vəzifəni davamlı olaraq icra edir.
2023-cü ildə təşkilat “Ölkə hüdudlarından kənarda yaşayan və təhsil almaq imkanı olmayan Azərbaycan vətəndaşı olan məktəb yaşlı uşaqların təhsilə cəlb edilməsi” adlı layihənin qalibi olub. Layihənin icrası ilə əlaqədar 2023-cü il 02, 03 və 04 sentyabr tarixlərində Türkiyənin İstanbul şəhərində “Azərbaycan Təhsil, Mədəniyyət və Sosial Həmrəylik Təşkilatı”nın binasında maarifləndirici tədbirlər həyata keçirilmişdir. Tədbirdə İstanbuldakı İkitelli, Günəşli və Bağcılar bölgələrində məskunlaşan Azərbaycan vətəndaşları və bir neçə ictimai təşkilat rəhbərləri iştirak edib. Tədbiri “Maarifçi Qadınlar” İB-nin və layihənin rəhbəri Şərqiyyə Məmmədova açaraq layihənin mahiyəti haqqında toplantı iştirakçılarına ətraflı məlumat verdi.
Tədbirdə “KİAMP-Karabakh is Azerbaijan!” Milli Platformasının Türkiyə Respublikasındakı Baş Koordinatoru Dr. Elvin Abdurahmanlı, “Şərq” qəzetinin Türkiyə təmsilçisi Yaqut Misirxanlı, valideynlər və digər ictimaiyyət nümayəndələri çıxış edərək fikirlərini ifadə etmişlər.
İctimaiyyət nümayəndələri tərəfindən təhsildən yayınaraq müxtəlif tekstillərdə çalışan məktəbyaşlı uşaqların təhsilə cəlb edilməsi üçün müəyyən işçi qrupları yaradılıb.
Ölkə hüdudlarından kənarda yaşayan və təhsil almaq imkanı olmayan Azərbaycan vətəndaşı olan məktəb yaşlı uşaqların təhsilə cəlb edilməsi məqsədilə davamlı tədbirlər həyata keçiriləcəkdir.
ZÜMRÜD
