Nazirlər Kabinetinin qərarına əsasən, 2023-2024-cü tədris ilində ölkənin hər bir ümumi təhsil müəssisəsi üzrə vahid məktəbli geyimi tətbiq ediləcək.
Həmin qərarda məktəblər tərəfindən 4 cür geyim formasından birinin seçilməsi nəzərdə tutulur. Məlumdur ki, valideynlər bu formaları paytaxt üzrə 18 məntəqədən əldə edə bilərlər. Lakin bu məntəqələrdən əlavə, bir sıra ticarət mərkəzlərində də məktəbli formaları satılır. Bundan əlavə, internet üzərindən də məktəbli geyimləri satılır. Belə ki, sosial şəbəkələrdə yeni məktəbli köynəkləri 2 manat 50 qəpiyə təqdim edilir. Daha çox İnstagram və TikTok səhfələrindən ucuz məktəbli geyimlərinin satışı ilə bağlı məlumatlar yayılır.
Qiymətin bu qədər ucuz olması ciddi müzakirələrə yol açıb. Çünki bu qiymətə satılan köynəyin keyfiyyəti ciddi şübhə doğurur. Bakı Tikiş Evi tərəfindən hazırlanan məktəbli köynəklərinin satış qiyməti 15 manat müəyyən edilib. Maraqlıdır, satış qiyməti 15 müəyyən edildiyi halda, onun 2 manat 50 qəpiyə təklif olunması nə dərəcə düzgündür? Ümumiyyətlə, 2.50 AZN-ə satılan məktəbli formalarını almaq təhlükəlidirmi?
Etibar Əzimov: “Bu qiymətə təklif edilən köynəyin keyfiyyəti barədə danışmaq yersizdir”
"Bakı Tikiş Evi”nin (BTE) satış şöbəsinin rəisi Etibar Əzimov "Bakı-Xəbər"ə açıqlamasında qeyd etdi ki, istənilən malın maya dəyəri olur: “Məktəbli köynəyinin də öz maya dəyəri var. Maraqlıdır ki, bu köynəyin maya dəyəri neçəyə çıxır ki, onu 2 manat 50 qəpiyə satırlar?! Bu, işbazların oyunudur. İnsanların heysiyyəti ilə oynayırlar. Bu qiymətə təklif edilən köynəyin keyfiyyəti barədə danışmaq yersizdir. Bu cür ucuz məhsullar keyfiyyətsiz olması ilə yanaşı, həm də insan orqanizmi üçün çox ciddi təhlükə mənbəyidir.
Ümumiyyətlə, kimə uşağının taleyi maraqlı deyil, sabah geyinəndə allergiya olacaq və ya hansısa başqa xəstəlik tutacaq, onu maraqlandırmırsa, gedib ucuz, saxta formalar alır. Kim istəyir, bizim satış mərkəzimizdən ala bilər, kim də istəmirsə, bu insanların şəxsi işidir, nə edək? Oradan-buradan parça gətirib tikib satırlar. Bu həmişə olub, yenə də olacaq. Biz öz məhsullarımıza cavabdehik. Məhsullarımızın qiyməti baha deyil, üstəlik pambıqdandır, sintetik deyil, zərərsizdir”.
Eyyub Hüseynov: “2 manat 50 qəpiyə məktəbli köynəyinin satılması narahatedici bir durumdur”
Azad İstehlakçılar Birliyinin (AİB) sədri Eyyub Hüseynov “Bakı-Xəbər”ə açıqlamasında qeyd etdi ki, 2 manat 50 qəpiyə məktəbli köynəyinin satılması narahatedici bir durumdur : “Belə hallar ona görə baş verir ki, 10 ildən artıqdır məktəbli forması ətrafında müzakirələr gedir, lakin konkret nəticəyə nail olunmur. Ölkəmizdə 1.5 milyondan artıq şagird var. Bu qədər şagirdin geyimi üçün ən azı 4-5 iri fabrik açmaq olar ki, bu ehtiyacı ödəsin. Bu da həm iş yeri, həm yerli istehsalın artımı, həm də valyutanın ölkəmizdə qalması deməkdir. Di gəl ki, hər il bu məsələ ətrafında müzakirə aparılsa da real iş yoxdur. Ona görə də işbazlar dövriyyəyə girir. Məktəb direktorları ilə sövdələşən işbazlar valideynləri formanı istədikləri qiymətə almağa məcbur edirlər. Bu da ancaq təəssüf doğurur”.
Günel CƏLİLOVA
