Azərbaycanda son illər abort etdirən qadınların sayı artıb. Açıqlanan statistik rəqəmlərə əsasən, son bir ildə Azərbaycanda abort etdirən məktəb yaşlı (15-17 yaşarası) qızların sayı yenidən artıb. Açıqlanan statistik rəqəmlərə əsasən, abort etdirən qadınların sayı 2021-ci illə müqayisədə ötən il 23,7% və ya 11 min 122 nəfər artaraq 57 min 999-a yüksəlib. Bu, indiyə kimi Azərbaycanda qeydə alınan ən yüksək göstərici olub.
Məktəb yaşlı qızlar arasında (15-17 yaş) abort etdirənlərin sayı isə son bir ildə təxminən 3 dəfə artıb. Belə ki, əvvəlki ildə 16 məktəbyaşlı qız abort etdirmişdisə, ötən il bu göstərici 57-yə yüksəlib.
Açıqlanan statistik rəqəmlərdən də bəlli olur ki, məktəblilər arasında abort etdirənlərin sayı artıb.
Pərvanə Mustafayeva: “Abort və doğuşların sayı göstərir ki, istənilən halda erkən nikah problemi ölkəmizdə mövcuddur”
Ginekoloq, həkim ekspert Pərvanə Mustafayeva “Bakı-Xəbər”ə açıqlamasında bildirdi ki, 15-17 yaş arası abort hallarının qeydə alınmasının əsas səbəbi erkən nikah faktorudur. Bu yaşda qadınların orqanizmi hamiləliyə hazır deyil: “Ona görə də 15-19 yaşda hamiləliyin gedişində fəsadların ortaya çıxma risqi reproduktiv yaşlı qadınlarla müqayisədə dəfələrlə yüksəkdir. Abort və doğuşların sayı göstərir ki, istənilən halda erkən nikah problemi ölkəmizdə mövcuddur. Bu gün əsasən erkən yaşda hamiləliklərdə dölün inkişafdan qalması halları müşahidə olunur. Həmin yeniyetmələrdə hamiləlikdə döl inkişafdan qaldıqda hamiləlik sonlandırılır və bu, abortların statistikasına əlavə olunur”.
Həmsöhbətimiz onu da əlavə etdi ki, yeniyetmələr arasında abortların artması Azərbaycanda cinsi tərbiyənin, cinsi maarifləndirmənin zəif olduğunun göstəricisidir: “Mövcud vəziyyətdən çıxış yolu 7-8-ci sinifdən etibarən sırf cinsi tərbiyə mövzusunda dərslərin keçirilməsidir. Qızlar və oğlanlar üçün bu dərslər ayrı-ayrılıqda da keçirilə bilər. Bu cür dərslərdə nə maraqlı sualları varsa, şagirdlər birbaşa həkim ginekoloqlara verə bilər. Şagirdlər bu haqda doğru məlumat almalıdır. “Cinsi əlaqə necə olmalıdır? Neçə yaşdan sonra cinsi həyata başlamaq olar? Hansı yollarla hamiləlikdən qorunmaq mümkündür? Erkən yaşlarda hamiləliyin fəsadları nədir” kimi mövzularla bağlı yeniyetmələr məlumatlandırılmalıdır”.
Aytəkin Kamranqızı: “Biz nə qədər milli mentalitetdən danışsaq da, müasir dünyanın müasir davranışları var, uşaqlar daha sərbəst, daha rahat və seksual azad olmağa üstünlük verir”
Sosioloq Aytəkin Kamranqızı “Bakı-Xəbər”ə açıqlamasında bildirdi ki, erkən yaşlı qızların hamilə qalması narahatlıq doğurur: “Nəzarətsiz qalan uşaqların sayı çoxdur. Baxmayaraq ki, onların valideynləri var, amma nəzarətsizlik sonda belə sonluqlarla nəticələnir. Yaxud da bəzi uşaqlar kifayət qədər sərbəst davranışa malik olur və onları idarə etmək çətindir. Biz nə qədər milli mentalitetdən danışsaq da, müasir dünyanın müasir davranışları var. Uşaqlar daha sərbəst, daha rahat və seksual azad olmağa üstünlük verirlər. Təbii ki, təcrübəsizlik, eyni zamanda nəzarətsizlik, ailədə zorakılıq halları buna təsir göstərir. Hamilə qalan qızların hamısı o demək deyil ki, öz xoşu ilə cinsi əlaqədə olub. Həmin rəqəmlər içərisində zorlama halları da baş verib. Kimsə polisə müraciət edib, uşağı qanuni yolla abort edirib. Abortları gizli şəkildə etmək heç yaxşı hal deyil. Bunun üçün mütləq qeydiyyatdan keçmək lazımdır. Heç bir həkim azyaşlı qızı özbaşına abort edə bilməz”.
Günel CƏLİLOVA
