Yeni tədris dövrünün başlamasına bir neçə həftə qalıb, artıq Bakı şəhərində ictimai nəqliyyatda sıxlıq artıb və daha çox küçədə tıxac müşahidə olunur. Ancaq tıxacları azaltmaq üçün hələlik tədbirlər görülməyib.
Məlumat üçün bildirək ki, ötən ayın sonunda Baş nazir Əli Əsədovun sədrliyi ilə Nəqliyyatı Əlaqələndirmə Şurasının iclası keçirilib. İclasda Bakı şəhərində nəqliyyat sisteminin təkmilləşdirilməsi və səmərəli işinin təşkil edilməsi ilə bağlı aidiyyəti qurumların rəhbərlərinin məruzələri dinlənilib, müvafiq tapşırıqlar verilib.
Onu da qeyd edək ki, Əlaqələndirmə Şurası aprel ayında yaradılıb. Şuranın məqsədi nəqliyyatın ayrı-ayrı növlərinin koordinasiyalı fəaliyyətinin və əhalinin mobilliyinin təmin edilməsi, yol və nəqliyyat infrastrukturunun inkişaf etdirilməsi, yol hərəkətinin təşkili, təhlükəsizliyi və tənzimlənməsi sahələrində fəaliyyətin əlaqələndirilməsi və təkmilləşdirilməsidir.
Maraqlıdır, növbəti tədris müddətinin başlaması ilə tıxaclar yenə də eyni vəziyyətdə olacaq? Məsələnin həlli üçün hansı addımlar atılmalıdır?
“Yay boyunca tıxacların qarşısının alınması ilə bağlı hər hansı bir iş görülməyibsə, biz yenə də eyni mənzərənin şahidi olacağıq”
Nəqliyyat eksperti Eldəniz Cəfərov hesab edir ki, Bakı şəhərindəki tıxacların obyektiv və subyektiv səbəbləri var: “Subyektiv səbəbləri mərhələli şəkildə aradan qaldıra bilərik. Obyektiv səbəbləri aradan qaldırmaq çətindir. Çünki Bakı paytaxt şəhərdir. İri sənaye şəhəridir. Bununla yanaşı zəngin mədəniyyət həyatı var. Bütün irimiqyaslı tədbirlər Bakı şəhərində, xüsusilə də mərkəzdə keçirilir”.
Həmsöhbətimiz onu da əlavə etdi ki, yay boyunca tıxacların qarşısının alınması ilə bağlı hər hansı bir iş görülməyibsə, biz yenə də eyni mənzərənin şahidi olacağıq: “Nəzərə almaq lazımdır ki, iri universitetlər, məktəblər, liseylər əsasən şəhərin mərkəzi hissəsində cəmləşib. Bu da məktəblərin açılması ərəfəsində tıxacları qaçılmaz edir. Əgər yay boyunca tıxacların qarşısının alınması ilə bağlı hər hansı bir iş görülməyibsə, biz yenə də eyni mənzərənin şahidi olacağıq. Bakıda tıxacların qarşısını 100 faiz almaq mümkün olmayacaq. Bütün yaşayış və qeyri-yaşayış obyektlərinin parklanma yerləri təşkil edilməlidir. Orta məktəblərin ayrıca parklanma yerləri olmalıdır. Təəssüf ki, bu gün orta məktəblərə gedən avtomobil yolları zəbt olunub. Təhsil müəssisələrinə yaxın ərazilərdə çoxmərtəbəli binalar tikilib. Belə olan halda valideynlər övladlarını məktəbə gətirərkən avtomobili elə yolun ortasındaca saxlamalı olur. Çünki azyaşlı uşağı, əlbəttə, heç kim özbaşına buraxmaz”.
Günel CƏLİLOVA
