Azərbaycanda yeni tədris ilinin başlamasına təxminən bir ay vaxt qalıb. Yeni tədris ili ilə bağlı valideynlər övladını məktəbə, balacaları isə bağçaya yazdırır.
Ancaq sığınacaqda olan uşaqlar nə məktəbə, nə də bağçaya götürülür. Bir sözlə, məktəb və bağçalar sığınacağa yerləşdirilən uşaqları qəbul etmək istəmir.
“Sənədlərində problemləri olsa da, Azərbaycan vətəndaşları olan bu fidanların təhsildən kənarda qalması qəbuledilməzdir”
Azərbaycan Uşaqlar Birliyinin rəhbəri Kəmalə Ağazadə “Bakı-Xəbər”ə açıqlamasında qeyd etdi ki, məsələ ilə bağlı Elm və təhsil naziri Emin Əmrullayevə məktubla müraciət edib. O, Nazirliyə müraciətində elektron sistemdə sənədsiz uşaqlar üçün pəncərə açılmasını istəyib: “Mənim balalarım təhsil almalıdır. Bu onların haqqıdır. Sənədləri olsa da, olmasa da onlar oxumalıdır. Təhsil onların gələcəyidir. Uşaqların sənədi olmadığına görə nə məktəbə, nə də bağçaya götürürlər. Bakı şəhəri, Binəqədi rayonu 246 saylı məktəbdə təhsilə, eləcə də fərdi təhsilə cəlb olunacaq 22 uşaq yeni tədris ilində birinci sinifdə oxumalıdır. 12 bağçayaşlı uşaq isə məktəbəqədər təhsilə cəlb olunmalıdır. Çarəsiz vəziyyətdə gözləyirik. Qeyd edim ki, bu uşaqlar insan alverinin, məişət zorakılığının, erkən nikahların potensial qurbanlarıdır. Kimsəsiz, baxımsız və bu qəbildən olan uşaqlara Mərkəzimizdə sosial, psixi, tibbi, hüquqi yardımın göstərilməsi, onların sığınacaqda təhsillə, paltarla, qida və zəruri xidmətlərlə təmin edilməsi həyata keçirilir. Bu təşkilat Nazirlər Kabinetinin 2012-ci il 25 aprel 89 nömrəli qərarına uyğun olaraq məişət zorakılığından zərər çəkmiş şəxslərə xidmət göstərilməsi üçün akkreditasiya olunub”.
Birlik sədri xüsusi olaraq qeyd etdi ki, sənədlərində problemləri olsa da, Azərbaycan vətəndaşları olan bu fidanların təhsildən kənarda qalması qəbuledilməzdir. Vaxt daralır, bu uşaqlar məktəbə və bağçaya getməlidir.
Günel CƏLİLOVA
