Bu gün ölkəmizdə dünya telekanallarına kabel televizyaları vasitəsilə baxılır. Vətəndaşlarımız ölkəmizdə fəaliyyət göstərən müxtəlif kabel televiziyalarına abinə olur, ödəniş müqabilində kanallara baxa bilirlər.
Amma təəssüf ki, bu kanalların bir çoxunda ermənipərəst qüvvələrə meydan verilir. Bu da tamaşaçıların haqlı narazllığına səbəb olur. Sual edirlər ki, Azərbaycanda yayımlanan kabel televiziyalarına kim nəzarət edir, yaxud etməlidir? Tamaşaçılar redaksiyamızla əlaqə saxlayıb bildirirlər ki, KATV, Ailə TV və başqa kabel televiziyalarında antitürk proqramlar yayımlanır. Daimi oxucularımızdan birinin verdiyi məlumata görə, bir neçə gün əvvəl xarici kanallardan birində "erməni soyqırımı" ilə bağlı film gedib və kabel televiziyası vasitəsilə Azərbaycanda da yayımlanıb. Bir neçə gün əvvəl isə Kino+ kanalında "Erməni mədəniyyəti" adlı erməni cizgi filmi gedib, bura da Göyçə gölünü salıblar, onu erməni gölü kimi qələmə veriblər. Antitürk filmlər nümayiş olunanda bizim kabel televiziyalar onların yayımını kəsə bilərmi? Azərbaycanda bu məsələ necə həllini tapmalıdır?
Ekspertlər hesab edirlər ki, Azərbaycanda kabel televiziyası şirkətləri bu halın qarşısını ala bilərlər. Onların fikrincə, yayımlanan proqramların siyahısı olur və proqramlarda antitürk materiallar, erməni təbliğatına həsr olunan verilişlər olarsa, Azərbaycan yayımçıları həmin proqramı kəsməlidir.
Zülfiyyə Eldarqızı: “Kabel televiziyaları ilə ölkəmizdə yayımlanan xarici kanallarda gedən verilişlərə xüsusi nəzarət olmalıdır”
Sənətşünaslıq üzrə fəlsəfə doktoru, bədii qiraətçi, aktrisa Zülfiyyə Eldarqızı “Bakı-Xəbər”ə bildirdi ki, bu kabel televiziyalarına kimlərin rəhbərlik etdiyi, onların direktorlarının, payçılarının Azərbaycandan, yaxud xaricdən olduğu barədə məlumatı yoxdur, amma bütün hallarda əlaqədar qurumlar bu məsələyə diqqət yetirməlidir. “Ümumiyyətlə, bu çox həssas məsələdir və ciddi nəzarət tələb edir. Televiziyalarda pultda oturan, çəkilişə, verilişə ciddi nəzarət edən bir adam olur.
Fikrimcə, kabel televiziyaları ilə ölkəmizdə yayımlanan xarici kanallarda gedən verilişlərə xüsusi nəzarət olmalıdır. Çünki bu vacibdir. Tamaşaçılar deyir erməni təbliğatını aparan kanallar bizdə də yayılır. Bunun üçün, əlbəttə, kabel televizyalarına rəhbərlik edənlər diqqətli olmalıdır. Bütövlükdə, faktlar araşdırılmalıdır. Nə üçün qondarma “erməni soyqırımı” barədə nümayiş olunan üzdəniraq veriliş bizim ölkəmizdə də göstərilməlidir? Çox arzu edərdik ki, bu istiqamətə diqqət artırılsın”-deyə Z. Eldarqızı əlavə etdi.
Ekspertlərin fikri öz yerində, məsələyə daha çox rəsmi qurumların mövqe bildirməsi lazımdır ki, narazı tamaşaçılar onların müraciətlərinin diqqətə alındığını və problemin həll olunduğunu görsünlər.
Fazil Novruzov: “…onları məsuliyyətdən azad etmir və diqqətli olub elə kontentləri çox yayan xarici kanalları paketdən çıxarmaları yaxşı olardı”
Mövzu ilə əlaqədar Audiovizual Şuranın Aparat rəhbəri Fazil Novruzovla əlaqə saxladıq. F.Novruzov “Bakı-Xəbər”ə açıqlamasında bunları dedi: “…Sizin bu suala belə cavab vermək olar: qeyd etdiyiniz kabel televiziyaları Şura tərəfindən verilən platforma operatoru ("Media haqqında" Qanunun 1.1.21-ci maddəsinə əsasən platforma operatoru – proqramların, o cümlədən sifarişli yayım xidmətlərinin kabel, İPTV, OTT, mobil TV və peyklə kodlanmış yayım siqnalları vasitəsilə retranslyasiyasını həyata keçirən fiziki və ya hüquqi şəxsdir) lisenziyası ilə fəaliyyət göstərirlər. Platforma operatorları (eləcə də, multipleks operatorları) retranslyasiya etdikləri xarici kanalların seçimində sərbəstdirlər və bu məsələdə Şuranın müdaxiləsi yolverilməzdir. "Media haqqında" Qanunun 1.1.23-ci maddəsinə əsasən retranslyasiya – hər hansı texnologiyadan istifadə etməklə televiziya və ya radio kanallarının, habelə proqramların və ya onların hissələrinin məzmununa dəyişiklik edilmədən yayımlandığı anda qəbulu və ötürülməsidir. Əslində burda operatorları da tam qınamaq olmaz, çünki retranslyasiya olunan 100-dən çox xarici kanalın kontentinə nəzarət etmək mümkün deyil. Amma sizin qeyd etdiyiniz hallar varsa, həmin kanal hansı operator və ya operatorlar tərəfindən retranslyasiya olunursa, birbaşa onlara müraciət edib, həmin kanalın paketdən çıxarılmasını istəyə bilərsiz, bu sizin hüququnuzdur. ümumiyyətlə, operatorlar, retranslyasiya paketlərini formalaşdırmaqda sərbəstdirlər. Amma bu yenə də onları məsuliyyətdən azad etmir və diqqətli olub elə kontentləri çox yayan xarici kanalları paketdən çıxarmaları yaxşı olardı. Siz qeyd etdiyiniz hallar arada bir Rusiya kanallarında yayımlanan proqramlarda olur. Amma bir proqrama görə də tam kanalı yayımlamamaq olmur axı... Əgər eyni hal bir kanalda çox, mütəmadi təkrarlanırsa, yuxarıda dediyim kimi, ya operator özü onu retranslyasiya etməkdən vaz keçə bilər, ya da elə abonentlər bunu ondan xahiş edə bilərlər. Çünki onların qarşılıqlı əlaqəsi aralarında bağladıqları müqavilə ilə tənzimlənir”.
İradə SARIYEVA
