Sosial şəbəkələrin insan həyatına, cəmiyyətin psixologiyasına təsirləri zaman keçdikcə özünü daha qabarıq şəkildə göstərməkdədir. Bəzən qəbul edilməyən, hətta ictimai ittiham obyekti olan müəyyən hərəkətlər, davranışlar belə müxtəlif platformalarda gün ərzində dəfələrlə insanın qarşısına çıxaraq şüuraltına təsirsiz ötüşmür. Bunun nəticəsində mənəvi təhdidə çevrilən video və paylaşımların sürətlə yayılan, təkrarlanmış müxtəlif variantlarının şahidi oluruq.
Məlumat üçün bildirək ki, 2016-cı ildən sosial mediaya daxil olan, qısa müddətdə istifadəçilərinin sayı sürətlə artan platformalardan biri də “Tik Tok”dur.
Bu illər ərzində "Tik Tok" artıq dövlətimiz üçün ciddi təhlükə mənbələrindən birinə çevrilib. Bununla yanaşı, "Tik Tok" müəyyən pis vərdişlərə təhrik, insan alverini əlçatan edən, dələduzluq hallarını artıran, eyni zamanda əxlaqi dəyərləri aşındıran neqativ davranışların virtual məkanı olub.
Bəli, bu platformada qadın alveri açıq formada həyata keçirilir. Belə ki, yüngül həyat tərzi yaşayan xanımlar bu platforma da öz hesabları vasitəsilə hansı qiymətə görüşəcəklərini elan edirlər. Qeyd edək ki, “Tik Tok”da bu kimi paylaşımlar yetərincədir.
Bir sözlə, “Tik Tok"da bütün Azərbaycan xalqının gözünün qabağında nəhəng bir əxlaqsızlıq yuvası fəaliyyət göstərir.
Könül İsmayılova: “Azərbaycanda "TikTok" platforması əxlaqsızlığın ən çox təbliğ edildiyi seqmentə çevrilib”
Psixoloq Könül İsmayılova “Bakı-Xəbər”ə açıqlamasında qeyd etdi ki, “Tik Tok” idarə və nəzarət olunmayan sosial şəbəkədir: “Məlumdur ki, "Facebook"- da hər videonu yaymaq və paylaşmaq qadağandır. Eləcə də digər sosial şəbəkələrdə. "Tik Tok"dan fərqli olaraq, o sosial şəbəkələr hər videonun yayılmasına icazə vermir. Ancaq "Tik Tok"da istənilən video paylaşılır. Bu sosial şəbəkədən daha çox gənclər və uşaqlar istifadə edir. Bu da gələcəyimizi təhlükə altına atmış olur. "Tik Tok" sosial və təhlükəsizlik problemləri yaratmaqla yanaşı, cəmiyyətdə, xüsusən uşaqlarda ciddi psixoloji fəsadlar da törədir. Bu şəbəkə insan psixologiyasına çox təsir edir”.
Psixoloqun sözlərinə görə, Azərbaycanda "Tik Tok" platforması əxlaqsızlığın ən çox təbliğ edildiyi seqmentə çevrilib: “Qanun pozuntusu varsa, əxlaqsızlıq aşılanırsa, şərəf və ləyaqətə toxunulubsa, müvafiq orqanlara müraciət etmək lazımdır. Həmin şəxslərə qarşı tədbir görülməyəndə cəzasız mühit olduğunu düşünürlər, rahat şəkildə özlərini büruzə verirlər. Bəli, bu gün bəzi yüngül həyat tərzi keçirən “Tik Tok”istifadəçiləri təəssüf ki, hansı peşə ilə məşğul olduqlarını etiraf edirlər. Onlar hansı qiymətə görüşdüklərini belə açıq şəkildə qeyd edir. Bu hal isə olduqca pisdir. Bu cür paylaşımlar, o insanlar nəzarətə götürülməlidir. Aidiyyəti qurumlar diqqətli olmalıdır. Çünki bu platforma elədir ki, istənilən yaş kateqoriyasında olan şəxs ora daxil olur. Belə davam edərsə, Azərbaycanda mənəviyyət, tərbiyə, dəyərlər daha da məhv ediləcək”.
Novella Cəfəroğlu: “Hüquq-mühafizə orqanları “Tik Tok”da insan alveri ilə məşğul olanları nəzarətə götürə, xəbərdarlıq edə bilər”
Hüquq müdafiəçisi Novella Cəfəroğlu hesab edir ki, “Tik Tok” açıq şəbəkədir, şikayət edilsə, deyəcəklər ki, istəmirsinizsə, baxmayın: “Ziyalı təbəqənin “Tik Tok”dan istifadə etməsinə çalışmalıyıq ki, bu sosial platformanın istiqamətini dəyişsinlər. Alverçi qadınları, tualetdə gic-gic canlı açan kişiləri boykot etsinlər. Nə qədər çox adam onları blok etsə, çıxıb canlıda heç nə edə bilməzlər. İstəsək də, “Tik Tok”u bağlamaq olmaz, dünya bizə gülər. Sadəcə, zərərsizləşdirməliyik. Məsələn, yaponlar, koreyalılar “Tik Tok”da öz mətbəxlərini təbliğ edirlər. Bizimkilər də Azərbaycanın milli mətbəxini təbliğ edə bilərlər. Ziyalılar öz sözlərini deməli, ailə, namus, Azərbaycanın milli adət-ənənələri məsələsini qaldırmalıdırlar. Professorlar girib “Tik Tok”da ailə dəyərlərindən danışsınlar. Köhnə dövrlərdə nümunə olan xanımlarımızı, rayonları, orada çalışan zəhmətkeş xanımlarımızı göstərsinlər. “Tik Tok”da bunu edə bilərik. Cəmiyyət dəyişsə, “Tik Tok”u da dəyişə bilərik. Tanınmışların çoxu deyir ki, “Tik Tok” dəlixanadır, ora girmək olmur”.
N.Cəfəroğlunun sözlərinə görə, hüquq-mühafizə orqanları “Tik Tok”da insan alveri ilə məşğul olanları nəzarətə götürə, xəbərdarlıq edə bilər: “Bəli, bu məsələyə qarışa bilərlər. Birinci dəfə həbs yox, böyük cərimələr qoya bilərlər. Görək cərimədən sonra yenə elə şeylərlə canlıya çıxa biləcəklər?”.
Günel CƏLİLOVA
