2023-2024-cu tədris ilinin başlamasına sayılı günlər qalıb.Yeni tədris ili ilə əlaqədar rayondan Bakıya oxumağa gələn tələbələr hələ də yaşamaq üçün yer tapa bilmir. Kirayə mənzillərin qiyməti dodaq uçuqladır. İstər şəhərin mərkəzində, istərsə də mərkəzə uzaq ərazilərdə qiymətlər od tutub yanır.
Ev axtaran tələbələrin problemi bununla bitmir. Onlayn formada ev axtaran şəxslər əksər hallarda dələduzların qurbanına çevrilir. Belə ki, ali təhsil müəssisəsinə yeni qəbul olan tələbələrin valideynləri şəhərə gəlmədən internet vasitəsilə ev axtarırlar. İnsanların məcbur ev axtardığı görən işbazlar hərəkətə keçərək beh adıyla pul tələb edir, evdə olmayan əşyaların vədini verir. Bu yolla da qiymətləri ucuz göstərərək tələbələri tələyə salırlar. İnternet vasitələri ilə tapılan evlər üçün əvvəcədən ödəniş alınsa da, sonra nə ev verilir, nə də pulu geri qaytarılır. Çarəsiz qalan vətəndaş internetdə yazılan nömrəyə zəng etsə də o nömrəyə cavab verən olmur.
“Yəni vətəndaşlar evləri görmədən özlərini vasitəçi adlandıran həmin fırıldaqçıların bank kartına pul göndərir, daha sonra isə…”
Əmlak məsələləri üzrə ekspert Elnur Fərzəliyev “Bakı-Xəbər”ə açıqlamasında qeyd etdi ki, gərək kirayə ev axtaran tələbələr özləri vizual olaraq mənzili görüb seçsinlər, şəxsən danışsınlar və behi müqavilə əsasında mənzil sahibinə ödəsinlər: “Kirayə ev axtaranlar əksəriyyəti paytaxta gəlməzdən internet resurslarına verilmiş elanlarla kirayə mənzili seçir. Mənzili və mənzil sahibini görmədən verilən beh batmış olur. Özlərini vasitəçi kimi təqdim edən bir qrup fırıldaqçı bu cür elan saytlarında ucuz evlərin elanlarını yerləşdirərək müştəri cəlb edirlər. Müxtəlif səbəblərdən “tez beh göndər saxlayım” kimi ifadələr işlədərək kirayəçidən həmin mənzilin bir hissəsini beh şəklində tələb edirlər. Yəni vətəndaşlar evləri görmədən özlərini vasitəçi adlandıran həmin fırıldaqçıların bank kartına pul göndərir. Daha sonra isə həmin nömrələrə zəng çatmır. Mənzilin pulu ödənilərkən notarial qaydada müqavilə bağlanmalıdır. Belə müqavilədə hər iki tərəfin öhdəlikləri verilir və hüquqları qorunur. Təbii ki, onlar arasında notarial şəkildə müqavilə olarsa hec bir tələbənin və yaxud kirayə mənzil götürən şəxsin hüququ tapdana bilməz”.
Günel CƏLİLOVA
