Taksi operator şirkətlərinin yaradılması vətəndaşların və sürücülərin işinin asanlaşdırılmasına hesablansa da, son illərdəki fəaliyyətləri heç də ürəkaçan deyil. Bir çox sürücülər və sərnişinlər davamlı olaraq, bu şirkətlərin işindən narazı qalırlar. Bəllidir ki, taksilərdə gediş haqqı artıb. Əvvəl yaxın məsafəni 2.5 AZN-ə gedilirdisə, indi bu 3 manat təşkil edir. Qiymət artımı taksi sifarişlərinin sayına təsir edib.
Onu da bildirək ki, xarici taksi şirkətlərinin qarşısında müəyyən tələblər qoyulub. Həmçinin, rəqəmsal inkişaf və nəqliyyat naziri Rəşad Nəbiyev, müavinləri və AYNA-nın sədri "Bolt" şirkətinin prezidenti Yevgeni Kabanov ilə onlayn görüş zamanı vətəndaşların fərdi məlumatlarının qorunması, xarici taksi şirkətlərinin datasının Azərbaycanda saxlanmasının vacibliyini bildirmişdi. Həmçinin Azərbaycanda "Fərdi məlumatların qorunması haqqında" yeni qanun layihəsi də hazırlanıb. Həmin qanun layihəsinə əsasən fərdi məlumatlar qorunmalıdır, xarici taksi şirkətləri datalarını Azərbaycana köçürməlidir.
Məlumat üçün bildirək ki, Azərbaycan bazarında 5 xarici investisiyalı taksi şirkəti fəaliyyət göstərir:
1. Uber ( Rusiya, bu brendin MDB-də sahibi Yandex-dir )
2. Bolt (Estoniya)
3. Yango (Rusiya, Yandex)
4. Maxim (Ukrayna)
5. Uklon Azərbaycan (Umico, PAŞA Holdinq)
Maraqlıdır, şirkətlər serverlərini Azərbaycana köçürəcəkmi?
Osman Gündüz: “Xarici taksi şirkətləri müəyyən müddətdən sonra datalarını Azərbaycana da köçürəcəklər”
İKT üzrə ekspert, Azərbaycan İnternet Forumunun prezidenti Osman Gündüz “Bakı-Xəbər”ə açıqlamasında qeyd etdi ki, Azərbaycanın Rəqəmsal İnkişaf və Nəqliyyat Nazirliyi (RİNN) ölkəmizdə fəaliyyət göstərən taksi şirkətlərinin data bazasını Azərbaycana köçürməyə israrlıdır: “Taksi şirkətləri ilə bağlı yaranan suallardan biri də odur ki, "Yandex" və digər xarici taksi şirkətləri serverlərini Azərbaycana gətirəcəkmi ? Çünki bir müddət öncə məlumat yayılmışdı ki, yandex.kz domeni Qazaxıstanda qapadılıb. Bu, Rusiyada taksi fəaliyyəti ilə məşğul olan şirkətlərin datalarının FSB üçün tam açıq olması haqqında hökumətin qərarı açıqlanandan sonra baş vermişdi. Qərar 1 sentyabrdan qüvvəyə minəcək. Burada data dedikdə taksi xidmətlərindən istifadə edən vətəndaşların telefon nömrələri, e-poçt ünvanları, İP ünvanları, bank məlumatları, gündəlik taksi sifariş verdiyi ünvanlar və s. nəzərdə tutulur. Qazaxıstanda "Yandex.Taxi" fəaliyyət göstərir, güman ki, Qazaxıstan hökuməti də öz vətəndaşlarının fərdi məlumatlarına FSB-nin girişinin qarşısını almaq üçün "Yandex.kz"ni qapatmaq qərarına gəlmişdi. Ötən gün "Yandex"in serverlərinin Qazaxıstana köçürməsi ilə bağlı məlumatlar yayılıb. Qazaxıstan rəsmiləri bunu təsdiqləyib. Düşünmək olar ki, Yandex Qazaxıstan bazarını itirməmək üçün Qazaxıstanla bağlı datanı bu ölkəyə daşımaq məcburiyyətində qalıb. Son zamanlar taksi bazarında addım-addım baş verənlərdən sonra belə qənaətə gəlmək olar ki, RİNN bu məsələlərdə çox israrlıdır. Düşünmək olar ki, xarici taksi şirkətləri müəyyən müddətdən sonra datalarını Azərbaycana da köçürəcəklər”.
Aslan Əsədov: “Xarici taksi şirkətləri ilə bağlı müəyyən ölçü götürülməlidir”
Nəqliyyat eksperti Aslan Əsədov “Bakı-Xəbər”ə açıqlamasında qeyd etdi ki, xarici taksi şirkətləri ilə bağlı müəyyən ölçü götürülməlidir.
Ekspertin sözlərinə görə, “Fərdi məlumatların qorunması haqqında" yeni qanun layihəsi zamanla müzakirələrə səbəb olub: “Bu söhbət tək Qazaxıstana aid deyil, Baltikyani ölkələrdə də bu tip qərarılar qəbul edilib. Hər bir dövlətin təhlükəsizliyi onun prioritet mövzusudur. Xarici taksi şirkətlərinin fəaliyyəti Azərbaycanda birşaxəli deyil. Bu tip şirkətlər qiyməti baha təklif edir. Bu səbəbdən də əhali həmin şirkətlərin xidmətindən istifadəyə maraqlı deyil”.
Günel CƏLİLOVA
