Avqustun 17-də Naxçıvan Uşaq Gənclər Yaradıcılıq Mərkəzində dünya şöhrətli rəssam İbrahim Safinin doğma vətənində 125 illik yubileyi qeyd olunub. Gecədə Naxçıvan Muxtar Respublikasının Mədəniyyət Nazirliyinin, Naxçıvan İcra Hakimiyyətin nümayəndələri, şəhid ailələri, ümumiyyətlə, Naxçıvan MR-nın ziyalıları, rəssamın qohumları, məktəblilər iştirak edib.
Qeyd edək ki, tədbir Milli Mədəniyyətin Təbliği İctimai Birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə icra etdiyi “İbrahim Safinin 125 illik yubileyinə həsr olunmuş eyni adlı “Rəngləri danışdıran adam” kitab və filminin təqdimatı” layihəsi çərçivəsində keçirilib.
Öncə Azərbaycanın ərazi bütövlüyü uğrunda canını fəda edən şəhidlərimiz 1 dəqiqəlik sükutla yad edilib. Sonra Milli Mədəniyyətin Təbliği İctimai Birliyinin sədri Jalə Cəfərova çıxış edərək layihə haqqında məlumat verib, həmçinin rəssam İbrahim Safinin həyat və yaradıcılığı haqqında danışıb. Gecədə iştirak edən mötəbər qonaqlar, eləcə də rəssam İbrahim Safinin qohumları öz çıxışlarında Jalə Cəfərovaya belə bir möhtəşəm tədbir keçirdiyinə görə təşəkkür ediblər. Naxçıvan MR Mədəniyyət Nazirliyi incəsənət və təhsil müəssisələri ilə iş şöbəsinin müdiri İmran Alirzayev kitabın və filmin İbrahim Safini gənc nəsillərə tanıtmaq baxımından əhəmiyyətli bir nəşr olduğunu xüsusi vurğulayıb.
Çıxışlardan sonra “Rəngləri danışdıran adam” sənədli filminin təqdimatı olub. Həmçinin gecədə “Jalənin İbrahim Safi ilə yuxuda görüşü” tamaşası nümayiş olunub. İB sədri Jalə Cəfərova bildirib ki, iki il öncə İbrahim Safini yuxusunda görüb: “Çox təsirləndim. Bu gün çox dəyərli, istedadlı rejissor Səyyad Məmmədovun sayəsində yuxum səhnələşdirilib və gecədə təqdim olundu. Bir neçə dəqiqəlik tamaşadan xeyli duyğulandıq. Ürəyinizə sağlıq”.
Tədbirdə Naxçıvan Dövlət Flarmoniyasının orkestrinin müşaiyəti ilə 4 musiqi nömrəsi səsləndirilib.
Sonda Milli Mədəniyyətin Təbliği İctimai Birliyi adından İbrahim Safi irsinin tədqiqində və təbliğində xidmətləri olan insanlara “Təşəkkürnamə”lər təqdim edilib.
Tədbir iştirakçılarına “Rəngləri danışdıran adam” kitabı verilib. Bundan başqa, layihə çərçivəsində Naxçıvan və Ordubaddakı kitabxanalara, muzeylərə bu kitab paylanılıb. Yubiley gecəsinə Bakıdan müxtəlif peşə sahibləri, həmçinin bir neçə qazimiz də iştirak edib. Yubiley gecəsindən sonra Jalə Cəfərova Naxçıvan MR Teleradiosunda Günaydın proqramında iştirak edib, həmçinin radio dalğalarında yazıçı, jurnalist Təranə Arifqızına geniş müsahibə verərək. “Bu iş burda bitmədi. Yaxın gələcəkdə rəssamın 1918-20-ci illərdə Nuru Paşanın ordusundakı xidmətlərini, mənfur qonşularımıza qarşı necə vuruşduğu məqamları araşdıracam” deyərək İbrahim Safi yaradıcılığından, həmçinin gələcək tədqiqat işlərindən danışıb.
ZÜMRÜD
