"Rafiq Əliyevin dediyini həqiqət kimi qəbul edə bilmərik"
Dini Qurumlarla İş üzrə Dövlət Komitəsinin sabiq sədri, professor Rafiq Əliyevin mətbuata müsahibəsində söylədiyi "... Məhəmməd Peyğəmbərin dövründə də belə şey olmayıb. Peyğəmbərimizin ilk xanımı Xədicə də dul qadın idi. Xədicədən sonra Peyğəmbərimizin neçə xanımı olub. Onları görüb. Belə çıxır ki, Məhəmməd peyğəmbər zina edib? Xoşuna gəlib, alıb. Hətta Məhəmməd Peyğəmbər öz nökərinin xanımına baxıb, xoşu gəlib və bunu dilə gətirib. Nökər isə öz arvadını boşayıb, Peyğəmbərə hədiyyə verib. Peyğəmbər də bu hədiyyəni qəbul edib..." fikri qalmaqala səbəb olub, sosial şəbəkələrdə tənqid edilib. Professor Əliyevin bir neçə gün əvvəl dediyi bu sözlər hələ də polemika mövzusudur.
"Fikirlərinizi geri götürüb yanlışınızı düzəltsəniz doğru olardı"
Onun Məhəmməd peyğəmbər barədə səsləndirdiyi iddialara şərh verən Milli Cəbhə Partiyasının sədr müavini, tanımış ilahiyyatçı Tural İrfan "Bakı-Xəbər"ə açıqlamasında bildirdi ki, R.Əliyev nə ilahiyyatçıdır, nə islamşünasdır, nə də tarixçidir. "Ona görə də, Rafiq Əliyevin dediyini həqiqət kimi qəbul edə bilmərik. O heç bir mənbəyə, Qurani-Kərimə, hədislərə əsaslanmır. O, uzaqbaşı Qərb şərqşünaslarının Sovet dövründə yazdığı kitablara əsaslana bilər. Bu kitablar da sovet dövründə sovet senzurasından keçmiş kitablardır ki, Şərqşünaslıq İnstitutunda onlara tədris edilib. Rafiq Əliyevin dini savadı da yoxdur... Dini Komitənin sədri olub deyə adamların ona simpatiyası var...
Cənab Rafiq Əliyevin "Məhəmməd Peyğəmbər öz nökərinin xanımına baxıb, xoşu gəlib və bunu dilə gətirib. Nökər isə öz arvadını boşayıb Peyğəmbərə hədiyyə verib. Peyğəmbər də bu hədiyyəni qəbul edib" sözlərini tamamilə anlaqsız və məsuliyyətsiz ifadələr hesab edirəm. Rafiq müəllimə simpatiyam var, ancaq o belə dayaz açıqlamalar verməklə cəmiyyətin inanclı kəsimini çaxnaşdırmağa cəhd etməməlidir. İslam tarixinin incəliklərini, fəlsəfəsini bilməyən cəmiyyətə birbaşa belə açıqlamalar vermək peyğəmbər haqda düşüncələri mənfi nöqtəyə fokuslayır.
İlahiyyatçı və tarixçi olmayan bir şəxsin sadəcə sovet dövrünün təhsil sistemindən bəhrələndiyi subyektiv məlumatlarla bu dayaz və yanıldıcı sözü işlətməsi təəssüf doğurur. Rafiq müəllim az qala hər gün rusca statuslar paylaşır, lakin sən demə həm də rusca düşünürmüş. Çünki onun açıqlaması sanki ruscadan tərcümədir. "Nökər" nədir? Harada yazılıb bu? Peyğəmbəri niyə ləkələyirsiniz? Onu arvadbaz kimi qələmə verib dolayı yolla, sətiraltı təhqir edirsiniz? Özünüz də bir neçə il Dini Qurumlarla iş üzrə Dövlət Komitəsinin sədri olmusunuz. Heç olmasa o idarənin ənənələrinə hörmət etmək laızmdır.
Rus sovet "şərqşünas" larının əsərlərində yazılsa da belə, axı tarix nəticəsinə görə qiymətləndirilir. Əgər peyğəmbər öz nökərinin arvadına göz dikmişdisə bu o dövrdə başqalarında niyə baş vermədi? İndiyəcən İslamı müxtəlif etiqadi məsələlərə görə rədd edən milyonlarla adam gəlib keçib. Onlardan bircəciyini göstərə bilərsinizmi ki, İslam dinini məhz "Peyğəmbərin nökərinin arvadını əlindən almasına görə" rədd etmiş olsun? Yoxdur! Məgər peyğəmbərin obrazı bugünə əxlaq mücəssəməsi olaraq gəlib çatmadımı? Siz isə onun obrazını arvadbaz, hətta nökərinin arvadına göz dikən bir şəxs olaraq təqdim edirsiniz.
Yaxşı olar ki, bilmədiyiniz şeydən danışmayın, açıqlama verməyin. Dini Komitənin bir neçə il sədri işləmək ilahiyyatçı alim, filosof, tarixçi olmaq demək deyil.
Sizi tənqid etmək istəməzdim. Ancaq elə bir söz deyibsiniz ki, sussam günahkar olacaqdım.
Ümumiyyətlə, peyğəmbər zamanında nökər anlayışı vardımı? O hansı nökər idi, hansı ilkin mənbədə bunlar yazılıb? Qadın kim idi? Nökər öz arvadını peyğəmbərə necə hədiyyə etdi?
Peyğəmbərin müqəddəs və əxlaq mücəssəməsi olan pak obrazını adi arvadbaz kişi səviyyəsinə endirməklə çox məsuliyyətsiz və yanlış ifadələr işlədibsiniz. Fikirlərinizi geri götürüb yanlışınızı düzəltsəniz doğru olardı"-" deyə qeyd etdi.
Əli TURABOV
