Şəhidliyi Vətən sevgisindən yaranan Xəyal Əlövsət oğlu Əhədzadənin 25 yaşı tamam oldu. Bu münasibətlə Lənkəran-Astara Regional Gənclər və İdman İdarəsinin rəisi Teymur Babazadə, idarənin və Gənclər Evi Sosial Xidmət Müəssisəsinin əməkdaşları şəhidin doğum günü məzarını ziyarət ediblər.
Azərbaycan Respublikası Silahlı Qüvvələrinin hərbi qulluqçusu Xəyal Əhədzadə 13 sentyabr 2022-ci il tarixdə düşmən təxribatının qarşısı alınması zamanı canından keçərək əbədiyyət adlı dünyasına qovuşub. Qısa ömür yolunda adını tarixin şərəfli səhifəsinə yazan şəhidimiz 27 sentyabr 2020-ci ildə başlanan, 44 gün çəkən haqq savaşımızda Murovdağ, Cəbrayıl, Fizuli və Şuşa istiqamətində gedən döyüşlərdə əsl qəhrəmanlıq nümunəsini göstərib. 30 ilik xalqın torpaq həsrətinə son qoyan igid Vətən sevdalısı dövlət tərəfindən “Azərbaycan Bayrağı” ordeninə, “Hərbi Xidmətdə Fərqlənməyə görə” 3-cü dərəcəli, Cəbrayılın, Fizulinin, Kəlbəcərin, eləcə Şuşanın azadlığı uğrunda medallarına layiq görülüb.
Ermənistan silahlı qüvvələrinin Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində törətdiyi genişmiqyaslı təxribatın qarşısı alınarkən şəhid olan Vətən müharibəsi iştirakçısı gizir Xəyal Əlövsət oğlunun doğma Azərbaycana bağlılığını, igidliyini, şücaətini dövlət başçısı yüksək qiymətləndirərək onu 3-cü dərəcəli “Rəşadət ordeni” və “Vətən uğrunda” medalı ilə (ölümündən sonra) təltif etmişdir.
Xəyal Əhədzadə Lənkəran Şəhər Gənclər və İdman İdarəsinin nəzdində Uşaq Gənclər İdman Məktəbinin yetirməsi olub. 2012-ci ildə Boks idman növü üzrə məktəblilərin Azərbaycan çempionatında 40 kiloqram çəki dərəcəsində birinci yeri qazanıb.
Bəli, Lənkəranın igid oğlu Xəyal Vətənin azadlığı, xalqının xoş gələcəyi naminə canından keçməyi bacardı. Odur ki, o, cismən aramızdan getsə də, onun yeri daim, əbədi milyonların ürəyi olacaq.
Zəfər ORUCOĞLU
Azərbaycan Jurnalistlər Birliyiin üzvü
