Sumqayıtda 7 yaşlı uşağın məşq zamanı müəllimi tərəfindən öldürülməsinin səs-küyü yatmamış daha bir dəhşətli hadisə baş verib. Bu dəfə Sumqayıt şəhər 1 saylı Uşaq-Gənclər İdman Məktəbinin rəhbərliyi və müəllimi kriminal əməlləri ilə gündəmə gəlib.
Bəzi saytların iddiasına görə, məktəbin cüdo bölməsinin müəllimi Əliyev Ceyhun Xasay oğlunun yanına məşqə gələn uşaqlara qarşı zor tətbiq etdiyi, qeyri-etik davrandığı aydın olub.
Valideynlərin şikayətindən sonra Sumqayıt şəhər 1 saylı Uşaq-Gənclər İdman Məktəbinin müəllimi Ceyhun Əliyev həbs edilib.
Məsələ ilə bağlı Sumqayıt şəhər 1 saylı Uşaq-Gənclər İdman Məktəbinini direktoru Fuad Aslanov qohumunu xəstəxanaya gətirdiyi üçün mediaya danışmaq imkanı olmadığını deyib.
Azərbaycan Cüdo Federasiyasının mətbuat katibi Ülkər Abbasova isə mediaya açıqlamasında bildirdi ki, hadisə ilə bağlı araşdırma aparılır:
“Ceyhun Əliyevin saxlanılması ilə bağlı məlumatımız var. Araşdırma aparılır. Amma rəsmi olaraq, hamı kimi cavab gözləyirik. Həbs olunma səbəbi ilə bağlı hansısa məlumatım yoxdur”.
Qeyd edək ki, 7 yaşlı uşağın ölümü ilə nəticələnən hadisənin baş verdiyi Hacı Zeynalabdin Tağıyev qəsəbəsindəki 19 saylı məktəbin də Fuad Aslanovun nəzarətində olduğu bildirilir.
Belə çıxır ki, Gənclər və İdman Nazirliyinin Sumqayıt İdarəsinin normal idarəetməsinin olmadığı səbəbindən belə hadisələr yaşanır. Bu barədə idman mütəxəsissləri nə düşünür?
İdman sahəsi üzrə ekspert Kənan Məstəliyev “Bakı-Xəbər”ə açıqlamasında bildirdi ki, bu məsələdə ən başlıca məsuliyyət Gənclər və İdman Nazirliyinin üzərinə düşür: “Görünən budur ki, əlaqədar dövlət qurumu sözügedən idman məktəblərilə bağlı müvafiq təftiş-nəzarəti həyata keçirmir. Bundan əvvəl 7 yaşlı uşağın ölümü ilə nəticələnən hadisə ilə bağlı paralellər apardıqda da ortaya ciddi nəticələr çıxır. Köhnə tip məşqçilərin müasir dərs metodlarına uyğun gəlməməsi faktı ilə üz-üzə qalırıq. Mən özüm də cüdo ilə məşğul olmuşam. Valideynlər arasında belə fikir vardı ki, məşqçi uşaqla neçə istəyirsə elə də davrana bilər. Yəni “əti sənin, sümüyü mənim” prinsipi ilə yanaşırdılar. Təki övladlarının nəticə verməsini istəyirdilər. Əvvəllər bu metod, ola bilsin ki, işləyirdi. Uşaqlar da bilirdi ki, müəllimdən valideynə şikayət etməyin heç bir əhəmiyyəti olmayacaq. Əksinə, valideynlər də məşqçinin tərəfini saxlayacaq. Artıq insanların həyata və idmana baxış bucağı da dəyişib. Burada artıq zor tətbiqi keçmir. Məşqçi hərtərəfli olmalı, xüsusilə də psixologiyanı bilməlidir. Uşaqlar artıq daha gözüaçıq və kommunikasiyalıdırlar. Valideynlərin də yanaşması tam fərqlidir. Son hadisənin təfərrüatı ilə bağlı ətraflı məlumat verilməyib. Ancaq ortada həbs varsa, deməli ciddi nəsə baş verib. Bir daha sübut olunur ki, idmanı zorakılıqla öyrətmək metodu özünü doğrultmur. Məşqçilərin özünə psixoloji dərslər keçilməlidir. Nazirlik bilməlidir ki, məşqçi seminarları çox vacib bir məsələyə çevrilib. Bu olmasa, bənzər hadisələrə gələcəkdə də rast gələcəyik”.
Məhəmmədəli QƏRİBLİ
