Dekabrın 15-də Bakı Konqres Mərkəzində Azərbaycan müəllimlərinin növbəti XVI qurultayı keçiriləcək.
Qurultayın keçirilməsinin əsas məqsədi Prezident İlham Əliyevin Sərəncamı ilə təsdiq edilmiş “Təhsilin inkişafı üzrə Dövlət Strategiyası”nda müəyyənləşdirilmiş hədəflərə nail olunması istiqamətində əldə edilmiş əhəmiyyətli nailiyyətlər, eləcə də 2018-ci ilin noyabrında keçirilmiş Azərbaycan müəllimlərinin XV qurultayından sonrakı müddət ərzində təhsil sistemində həyata keçirilmiş tədbirlər və islahatlar barədə Azərbaycan ictimaiyyətini məlumatlandırmaqdır.
Maraqlıdır, qurultay Azərbaycan təhsil və məktəb sektorunda hansı problemləri həll edəcək?
Nadir İsrafilov: “Konqresdə “Təhsilin inkişafı üzrə Dövlət Strategiyası”nda müəyyənləşdirilmiş hədəflərə nail olunması istiqamətində əldə edilmiş əhəmiyyətli nailiyyətlərə toxunulacaq”
Təhsil eksperti Nadir İsrafilov “Bakı-Xəbər”ə açıqlamasında bunları qeyd etdi: “Məlum olduğu kimi, Prezident İlham Əliyevin ötən ilin iyulunda imzaladığı fərmanla idarəetmənin təkmilləşdirilməsi məqsədilə Elm və Təhsil Nazirliyinin tabeliyində Elm və Ali Təhsil üzrə Dövlət Agentliyi və Məktəbəqədər və Ümumi Təhsil üzrə Dövlət Agentliyi yaradılıb.
Agentliyin vəzifələrinə Azərbaycan Prezidentinin 2023-cü il 24 iyul tarixli Fərmanı ilə təsdiq edilmiş “Azərbaycan Respublikasının Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin Əsasnaməsi”nin 3-cü bəndində qeyd olunur ki, Agentlik müvafiq sahəni tənzimləyən normativ hüquqi aktların hazırlanmasında iştirak etməlidir. Həmçinin, onlara dair rəy vermək, müvafiq sahədə dövlət proqramlarının, strategiyaların, milli fəaliyyət planlarının, konsepsiyaların, layihələrinin hazırlanmasında iştirak etmək və digər səlahiyyətlərinə malikdir. Elm və Təhsil Nazirliyinin tabeliyində iki agentliyin may ayında yaradılmasını planlaşdırılır. Bununla bağlı bu ilin fevralında media üçün brifinqdə elm və təhsil naziri Emin Əmrullayev dedi ki, artıq işlərin böyük qismi geridə qalıb. Hüquqi normativlə bağlı müvafiq əsasnamələr hazırlanıb və müvafiq qurumlıara göndərilib. Bəzi dəyişikliklər elm və təhsil haqqında qanunlara dəyişiklik edilməsini tələb edir. Düşünürəm ki, bu, bir neçə ay davam edəcək. Artıq növbəti tədris ilinin hazırlıqlarını Elm və Təhsil Nazirliyi yox, Agentliklər edəcək.
Sözügedən agentliklərin tam formalaşdırılmasında müəyyən ləngimələr müşahidə olunsa da, bu qurumların fəaliiyyətə başlaması ilə təhsil müəssisələrində təhsilin müvafiq dövlət standartlarına uyğun təşkilinə nəzarət gücləndiriləcək. Elm və təhsil sahəsində tənzimləmə və idarəetmənin qabaqcıl beynəlxalq təcrübə əsasında təkmilləşdirilməsi təhsil müəssisələrində nəticəyönlü, şəffaf və səmərəli idarəetmə modelinin formalaşdırilmasına səbəb olacaq. Həmçinin, müasir idarəetmə texnologiyalarından istifadənin təmin edilməsində, bir çox həlli vacib digər məsələlərlə bağlı proqnoz və təkliflər hazırlayaraq rəhbərliyə təqdim etməsində nəzərəçarpacaq irəliləyişin baş verəcəyi gözləniləndir. Çünki biz artıq Peşə Təhsili üzrə Dövlət Agentliyi və Təhsildə Keyfiyyət Təminatı Agentliyi (TKTA) yaradıldıqdan sonra istər peşə təhsili sahəsində, istərsə də diplomların tanınması sahəsində qısa müddətdə nəzərəçarpacaq irəliləyişin şahidi olmuşuq”.
N.İsrafilov hesab edir ki, keçirilməsi dekabrın 15-nə planlaşdırılan Azərbaycan müəllimlərinin növbəti XVI qurultayında Prezident İlham Əliyevin Sərəncamı ilə təsdiq edilmiş “Təhsilin inkişafı üzrə Dövlət Strategiyası”nda müəyyənləşdirilmiş hədəflərə nail olunması istiqamətində əldə edilmiş əhəmiyyətli nailiyyətlərə toxunulacaq. Eləcə də 2018-ci ilin noyabrında keçirilmiş Azərbaycan müəllimlərinin XV qurultayından sonrakı müddət ərzində təhsil sistemində həyata keçirilmiş tədbirlər və islahatlar müzakirə olunacaq. Eyni zamanda, yeni yaradılan agentliklərin də məqsəd və vəzifələri barədə məlumat veriləcək.
İlqar Orucov: “Qurultayda təkcə nailiyyətlər deyil, mövcud çətinliklər, problemlər ətrafında da fikir mübadiləsi aparılacaq”
Azərbaycan Respublikası Elm və Təhsil Nazirliyi yanında İctimai Şuranın üzvü, fəlsəfə doktoru İlqar Orucov hesab edir ki, qurultayda təkcə nailiyyətlər deyil, mövcud çətinliklər, problemlər ətrafında da fikir mübadiləsi aparılacaq: “Bu qurultay eyni zamanda gələcəklə bağlı planların hazırlanması istiqamətində faydalı platforma rolunu oynayacaq. Sonucu qurultaydan sonrakı müddət ərzində təhsil sistemində bir sıra dəyişikliklər, islahatlar həyata keçirildi, yeniliklər oldu. Vacib məqamlardan biri də odur ki, qarşıda bizi gözləyən qurultayda cənab Prezidentin sərəncamları ilə təsdiq edilmiş “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nda müəyyənləşdirilmiş hədəflərə nail olunması və “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın icrası istiqamətində təhsil sistemi qarşısında duran vəzifələr müəyyənləşdiriləcək”.
Günel CƏLİLOVA
