Elə insanlar var ki, onların ölümü sənə doğmaların ölümü qədər yaxın və əziz olur. Əlli ildən çox tanıdığım, sənətinə, insanlığına böyük hörmət etdiyim dostum Ağadadaş Canmirzə oğlu Manafovun qəfil ölümü məni də çox sarsıtdı.
İnsan yaşadıqca arzular onu rahat buraxmır. Bütün arzularının çin olmasını istəyir. Bəzən buna nail olur, bəzənsə vaxtsız ölüm arzularını yarı yolda qoyur. Yaxşı xatirimdədir, İncəsənət İnstitutuna daxil olanda çox sevinirdi. Anası Dəstəgül xala o qədər sevincli idi ki, bilmirdi nə etsin. Tələbə biletini alanda evlərində böyük qonaqlıq oldu. Yaxınları, dostları onu təbrikə gəlirdi. Dəstəgül xala hamını gülərüzlə qarşılayar və elədə yola salardı.
Aramızda yeddi, səkkiz yaş fərq olsa da, bir böyük kimi o mənə öz köməkliyini əsirgəməzdi.
Yadımdadır, ali məktəbdə oxuduğu illərdə Binəqədi rayonunun "Xutor" deyilən ərazisində ana-bala kiçik bir otaq kirayə etmişdilər. Hər həftə mən onlara gedib şirin söhbət edərdik.
Dəstəgül xalanın o ətirli çayı, hazırladığı təamlar çox dadlı olurdu. Ali məktəbin yuxarı kursunda Ağadadaşı (bacarığına görə) indiki Musiqili Komediya Teatrının xor truppasına dəvət etmişdilər.
Tez-tez məni də teatra aparırdı. Məktəbi bitirindən sonra təyinatı üzrə elə Musiqili Komediya Teatrına aktyor kimi dəvət olundu. Bir neçə il müxtəlif rollarda yaddaqalan obrazlar yaratdı. Sonradan doğulub boya-başa çatdığı Siyəzən şəhərinə işə dəvət alır.
Bir müddət Siyəzən Neft və Qazçıxarma İdarəsinin nəzdində fəaliyyət göstərən Mədəniyyət Mərkəzində bədii rəhbər, direktor vəzifələrində işləmişdir.
Yaxşı yadımdadır, şimal rayonlarının birinə toy məclisinə dəvət almışdım. Şəhərdən mənimlə bir neçə yoldaş da gəlmişdi. Biləndə ki, məclisi Ağadadaş idarə edir, çox sevindim. Vaxt tapıb onunla səmimi görüşdüm. O, çox səmimi, qonaqpərvər şəxsiyyət idi. Onun şirin, məzəli söhbətlərindən doymaq olmazdı. Boya-başa çatdığı Siyəzən rayonunun həm quru, həm də sərt təbiəti onu həyatın çətinliklərinə öyrətmişdi. Əbəs yerə deməyiblər ki, hər bir uğur özü ilə növbəti bir uğur gətirir. Mədəniyyət və İncəsənət sahəsindəki xidmətlərinə görə dəfələrlə rayon İcra Hakimiyyətinin, rayon Mədəniyyət İdarəsinin fəxri fərmanlarına layiq görülmüşdü. Üç ay öncə 75 illiyi oldu, telefonda xeyli danışıb onu təbrik etdim. Səsi zəif gəlirdi, səhhətində problem olduğunu bilirdim.
Ona da qeyd edim ki, Ağadadaş həm aktyor, həm vokalist, həm də müğənni kimi özünü tanıda bilmişdi. İstər məhsul bayramlarında, istərsə də yeni il şənliklərində və Novruz bayramlarında aparıcılıq etmişdir.
O heç kəsdən köməyini əsirgəməyib, hər kəsə mənəvi dayaq durardı.
Ağadadaş Canmirzə oğlu çoxsaylı dostları, tələbələri, tanışlarının xatirində, yaddaşında uca, təşkilatçı, sözübütöv, tələbkar, xalqını, vətənini sevən, sadə insan keyfiyyətlərini özündə birləşdirən ziyalı bir şəxsiyyət kimi qaldı.
Ömrünü sənətinə, ailəsinə həsr etdi. Ən çətin anında Tanrıdan kömək istədi, ona əl açdı. Elə ona görə Tanrı ucalığına yol tapdı. Tanrının sevimli bəndəsi kimi zaman ucalığında qalacağına əmin oldu və bu əminliklə də bizləri tərk etdi.
Elşad Dağlı "Cabir Novruz" Mədəniyyət Fondu mətbuat xidmətinin rəhbəri, Azərbaycan Yazıçılar Birliyinin, Azərbaycan Jurnalistlər Birliyinin üzvü
