Son illər Bakıda tikilən yeni çoxmərtəbəli binalarda az sayda mənzilin mülkiyyət hüquqlarının dövlət qeydiyyatına alınması barədə çıxarışı (kupça) var. Yeni binalarda "kupça” problemi ilə bağlı məsələ uzun müddətdir ki, davam edir. Vətəndaşlar üçün sənədləşmə prosesi xeyli asanlaşdırılsa da, hələ də rəqəmlər göstərir ki, dövlət qeydiyyatına alınmayan kifayət qədər ev qalmaqdadır.
Bu üzdən, çıxarışsız mənzillərlə bağlı bəzi problemlər də qalmaqdadır. Belə ki, çıxarışsız mənzilləri alanlar digər şəxsə satanda Mənzil-Tikinti Kooperativləri (MTK) onlardan alqı-satqı müqaviləsinin dəyişdirilməsinə görə ödəniş tələb edir. Bu ödənişlərin məbləği MTK-lara görə min manatdan dörd-beş min manata qədər dəyişə bilir.
Maraqlıdır, bu tip ödənişlərin alınması qanunidirmi?
Hüseyn Axundov: “Mənzillərə çıxarış vermək adı ilə MTK-da tələb olunan vəsait qanunsuzdur”
Hüquqşunas Hüseyn Axundov “Bakı-Xəbər”ə açıqlamasında qeyd etdi ki, mənzillərə çıxarış vermək adı ilə MTK-da tələb olunan vəsait qanunsuzdur: “Bu vəsaiti də sual edəndə bəzən deyirlər ki, guya binanın kommunal haqları verilməyib və ya sayğac quraşdırılmasına verilməli olan puldur. Sayğac və kommunal haqqının çıxarışa heç bir aidiyyəti yoxdur və bu tələblər vətəndaşlara çıxarış verilməsinə mane ola bilməz”.
Elnur Fərzəliyev: “Yeni tikililərdə çıxarışsız mənzillərin satışı ilə bağlı tez-tez problemlər yaşanır, burada…”
Daşınmaz əmlak bazarı üzrə ekspert Elnur Fərzəliyev “Bakı-Xəbər”ə açıqlamasında qeyd etdi ki, qanunvericilikdə belə bir ödəniş nəzərdə tutulmayıb: “Həmin ödəniş olmasa MTK-lar alqı-satqını aparmaqdan imtina edirlər. Çıxarışlı mənzillərdə isə proses fərqli olur. Binanın yerləşdiyi ünvana çıxarışlı mənzil sahibinin qeydiyyatı olmayanda və ya üç ildən az olanda mənzilin ümumi sahəsindən 30 kvadratmetrlik hissə çıxılır, yerdə qalan hissəyə görə binanın yerləşdiyi əraziyə əsasən vergi ödənilir. Yəni yaşayış mənzilinin sahəsi 30 kvadratmetrdən az olduğuna görə əmlak vergisi hesablanmır. Ümumiyyətlə, yeni tikililərdə çıxarışsız mənzillərin satışı ilə bağlı tez-tez problemlər yaşanır. Burada ümumi reyestrin aparılmaması, mənzillərin qeydiyyatının olmaması bir mənzilin bir neçə nəfərə satılması hallarına yol açıb”.
Günel CƏLİLOVA
